BBBP-in HSLC Exam 2020-a Serchhip District-a hmeichhia tithate chawimawina an ni

Kumin a High School Leaving Certificate (HSLC) Exam-a Serchhip District chhunga hmeichhe zirlai tithate chawimawina chu Beti Bachao Beti Padhao (BBBP) Serchhip hmalakna in nimin khan neih a ni.

Beti Bachao Beti Padhao (BBBP) Serchhip hmalaknaa pawl 10 Exam-a zirlai tithate chawimawina hun hi Serchhip DC’s Conference Hall-ah neih niin he hun hmanpuitu Serchhip District Bawrhsap, Kumar Abhishek, IAS chuan heng zirlai titha an chawimawi te chu Beti Bachao Beti Padhao hmalakna meichher chhitute an ni tih sawiin, hmalam hun eng tak nei, zirlai taima bik an nih thu leh Mizoram tan mai nilo, India ram tan pawha mi chhen-fakawm takah an chhuak thei tih a sawi a. “Tum fel tak neiin lehkha zir ula, zirna hi lo bansan reng reng suh u,” tia zirlaite chu fuihin, an zir zelna turah harsatna emaw, hriatchian duhte an nei a nih chuan engtiklai pawhin Deputy Commissioner Office dawr theih renga an awm thu a hrilh a, chawimawi tlak khawpa an thawhrimna ah lawmthu a hrilh bawk.

Nimin-a Hmeichhia zirlai titha chawimawina hunah hian Lalrempuii D/o Lalrammawia, Marian H/S Serchhip; Vanrambeiseii D/o R. Lalbiaknunga, Hrangturzo H/S, N. Vanlaiphai; PC. Vanlalzawni D/o PC. Lalremsanga, Govt. Bungtlang H/S; Lalrinsangi Sailo D/o Samson Lalramliana Sailo, Marian H/S Serchhip; Malsawmsangi D/o Lalthlan-mawia, PES, Serchhip; Lalrohlupuii D/o Zolianmawia, Marian H/S, Serchhip; Lalremruati D/o T. Vanlalruata, Marian H/S Serchhip; Rosangzuali D/o PC. Zoliana, Govt. Bungtlang H/S; Vanlalnunhlui Sailo D/o Vanlalsailova, Marian H/S leh Lalrinpuii D/o C. Zonunsiama, Marian H/S te hnenah chawimawina hlan a ni.

Nimin chawimawi heng zirlai naupangte hi Academic Professor, Civil Service leh Doctor nih tum an ni hlawm a, BBBP hmanga lawmpuina thilpek hian Citation leh pawisafai Rs. 9000/- a keng tel a. Lalrempuii D/o Lalrammawia, Marian H/S hi Mizoram pum Top 10-a lang phak a nih avangin Citation chi hnih bakah pawisafai hi Rs. 19,000/- hlan a ni a. Chawimawina thuziak te hi Bawrhsap hian hlanin, pawisafai erawh an Bank Account-ah theuh thun sak an ni thung.

Nimin-a he hun hman hi BBBP Nodal Officer, Dr. Manasia Khaimeichho, MCS chuan kaihruaiin Serchhip District Addl. DC, Lalmuansanga Ralte pawhin fuihna thu sawiin, mahni inrintawkna (confidence) chu kan thawmhnaw leh lan danah nilovin, kan chhungrila kan thiamna, hriatna leh theihna ah te a awm tur a ni, a ti a. Chung thiltha tinreng te chu zirna hmanga neih theih a nih thu sawiin, theihtawp chhuah zel turin a fuih bawk.