Serchhip-ah National Nutrition Month (Rashtrya Poshan Maah), 2020 hawnna neih a ni

Tun thla chhunga hman tur, National Nutrition Month (Rashtrya Poshan Maah) chu nimin khan Serchhip District-a kalpui turin District Bawrhsap, Kumar Abhishek IAS chuan a hawng a, Poshan Maah chungchanga hmalak dan tur hrang hrang ngaihthlak a ni bawk.

Serchhip DC Meeting Hall-a Poshan National Nutrition Month (Rashtrya Poshan Maah) hawnna hunah hian District Bawrhsap, Kumar Abhishek chuan National Nutrition Month chu Poshan Abhiyan hmalakna peng pawimawh tak, ramchhunga nu naupai leh nau pawm leh naute kum 6 hnuailam te hriselna kawnga beihpui thlakna a ni, a ti a. Nu hriselna chuan a fa hriselna a nghawng a, fa hriselna chuan thangthar lo awm zel turte hriselna a nghawng bawk a; chuvang chuan he hmalakna hi hmalakna pawimawh, ram tana chhenfakawm, uar taka mipuite hnena inzirtir chi thil a ni, a ti a. Hemi atana District, Block leh Village Level a thawktu zawng zawngte chu Media hmanga thahnem ngai taka hma la tura fuihin, Block Level-ah Convergence Meeting a rang lama neih tha a tih thu a tarlang bawk a. Serchhip ICDS Project inbuatsaihna leh hmalak tawhna chinah lawmthu sawiin, an hlawhtlin tawhna ah lawmpuina a hlan bawk.

He hun kaihruaitu Serchhip ICDS Project-a CDPO, Lalbiakliana chuan Poshan Maah hman dan tura State thuneitu sang zawkte ruahmanna siam te a sawifiah a, September thla chhunga he hun hman turah hian thupui chi hrang 6- Anaemia, Complementary Feeding, Exclusive Breast Feeding, 1000 days Window of opportunity, Care of New Weak Born (KMC) leh Underweight & Wasting te kalpui a nih tur thu a sawi a. COVID-19 hripui laka himna dante zawm chunga chung hmalakna te chu neih tur a nih thu a tarlang a. Media Campaign uar taka neih a nih tur thu a sawi bawk.

He hunah hian sawm bik mi tlemte telin James Lalremliana, DPC chuan lawmthu sawina hun a hmang a, Poshan Maah hmalak dan tur tlangpui ruahmanna siam te chu a lem nen thlirho a ni bawk. He Programme hi kar hmasa lama hman tura ruahman ni tawh mah se India President hlui boral avanga sawnin nimin khan hman a ni ta zawk a ni.

Comments

Chhiar Hlawhte