Serchhip-ah hri kai 3 hmuh belh leh an ni

Serchhip District chhunga Quarantine Centre-a awm te Sample enfiahna ah niminpiah khan COVID-19 hri kai mi pathum hmuh belh niin Serchhip Distrit-a COVID-19 hri kai hmuhchhuah chu 18 an tling ta.

Serchhip CMO Office atanga thu kan dawn danin niminpiah-a Serchhip District atanga COVID-19 hri kai hmuhchhuah te hi BSF Sipai te vek niin tun thla ni 4, Zirtawpni kalta khan Silchar Quarantine Centre atangin Serchhip-ah rawn thlengin Marian H/S-a Community Quarantine Centre-ah dahluh an ni a, an vai hian mi 44 rawn thlengin niminpiah-a Rapid Antigen Test hmanga an Sample enfiah sak an nih hnuah an zinga mi pathum te chuan hri an kai tih hmuhchhuah a ni a, heng mite hi 60th Bn. BSF Sipai mi leh sa, Chawlh hmang zo-a Mizoram-a rawn lut leh Dawngzawl hmuna awm turte niin State hrang hrang atanga rawn haw te an ni a, an vai hian kum 32 atanga 45 niin nimin-a hri an kai tih hmuhchhuah a nih hnu hian Nursing School CCC-ah dahluh nghal an ni.

Heti hian Serchhip District-ah COVID-19 hri kai hmuhchhuah chu mi 18 an tling ve ta a, an zinga mi 11 te chu enkawl dam ni tawhin tunah hian midang 7 te chu enkawl mek an la ni a. Hmun dang atanga Serchhip District-a hri kai enkawl tur rawn dahluh te nen Serchhip District-a hri kai enkawl mek chu mi 24 ni thungin SIRD DCHC-ah mi 4, Nursing School CCC-ah mi 13 leh Thenzawl AYUSH Hospital CCC-ah mi 7 an ni.