Serchhip-ah Crime Review Meeting neih a ni

Nimin khan Serchhip SP Office Conference Hall-ah Serchhip District chhunga Police Station hrang hrangte hnathawh dan thlirletna hun, Crime Review Meeting neih a ni.

Serchhip District Crime Review Meeting hi Serchhip Addl. SP, PC. Laltanpuia chuan kaihruaiin he huna tarlan a nih danin kumin (2020) January atanga tun thla, September 9 thleng khan Serchhip District Police te hian thubuai 46 ziaklutin heng te hi Serchhip Police Station-ah 37, North Vanlai-phai Police Station-ah 3 leh Thenzawl Police Station-ah 6 te a ni a, heng thubuai ziahluh zingah hian thubuai 34-ah chuan Chargesheet thehluh ni tawhin thubuai ngaihtuah lai 26 awmin thubuai chhui lai 12 a awm a, thubuai 8-ah te chu Court-ah thubuai ngaihtuahin thiamloh chantir an ni tawh bawk.

Kumin chhunga thubuai ziahluh zingah hian rukruk kaihhnawih thubuai tam berin 12 ziahluh a ni a, zu leh a kaihhnawih ah thubuai 6 ziahluh niin kumtlinglo laka hursualna kaihhnawih thubuai POCSO Act hnuaiah 4 leh ruihhlo kaihhnawih ah thubuai 3 ziahluh a ni bawk a. Heng bakah hian Juvenile Justice Act, IT Act leh Foreigners Act hnuaiah thubuai pakhat theuh ziahluh a ni bawk.

Nimin a Serchhip Police Crime Review Meeting-ah Serchhip District chhung Police Station pathum atangin Officer Incharge (OC) 3 te leh Investigating Officer (IO) 5 te telin, District chhung Police Station hrang hrang a hnathawh leh hmalak dan tlangpuite ngaihthlak anih bakah tunlai hri leng avanga sawrkar thupek hrang hrang kenkawh chungchangah infuihthar lehna hun hman a ni bawk.