September 30, 2020 thleng atan mipuite khuahkhirhna tur siam thar leh a ni

Mizoram sawrkar chuan nimin, September 1, 2020 atanga hman tan turin Mizoram-a hrileng avanga mipui khuahkhirhna tur a siam thar leh a, COVID-19 hripui laka invenna kalpui meka inthlahdulna kalpui mekah hian thil danglam lutuk erawh a awm rihlo thung.

Mizoram State Disaster Management Authority-a State Executive Committee Chairman leh Mizoram Chief Secretary ni bawk, Lalnunmawia Chuaungo in tun thla ni 30 thleng awh tur Mizoram chhunga inkaihhruaina kalpui dan tur a tihchhuah ah hian Mizoram luhchhuahna Inter-State Border hawn mek- Bairabi, Vairengte leh Kanhmun kaltlang kawngpuite chu bungraw phur lirthei tan hawn chhunzawm a ni anga. Passenger phur Motor tan erawh chuan Screening leh Quarantine chungchang fel taka ruahman a nih zel theih nan Thawhtanni, Ningani leh Inrinni apiangin zing dar 6:00 atanga chawhnu dar 2:00 chhung hawh a ni ang, Lengpui Airport chu bungraw phur (cargo) thlawhna tan hawn chhunzawm a ni anga. Commercial passenger flight-te tan erawh chuan hawn ni a hranpa a chhuah thin a ni ang.

Mizoram-a lo lut te Screening leh Quarantine chungchang chu a hma anga kalpui chhunzawm tur a ni anga, Mizoram chhunga Sawrkar Office zawng zawngte chu dan pangngaiin kal tur niin, Office dangte pawh Office chhunga Social Distancing khauh taka kalpui chunga hawn tur a ni anga, Office chhungah kut silna hmanrua (tui, sahbawn/handwash) an buatsaih ngei ngei tur a ni bawk. Office dawr tur reng rengin appointment an la hmasa tur a ni a, Office dawrtu ten Office an dawr chhungin Mask vuah ngei tur a ni a, Office hnathawk, damlohna nei sa emaw, hrisel lohna bik nei leh nau paite, Office kal thei lo te chu chawlh (Commuted Leave) pek theih an ni ang.

District Hqrs. ah te chuan zan dar 8:30 atanga zing dar 4:30 inkarah pawn chhuah khap a ni leh dawn a, phalna nei lova vantlang hmun-a mi 5 aia tam punkhawm khap niin loh theihloh thil a nih loh chuan kum 65 chin chunglam te, taksa hriselna lama harsatna nei sa te (Chuap thalo, HIV Positive, Zunthlum nasa, Lungna, Kalna, adt.), nau paite leh naupang kum 10 hnuailamte chu pawn chhuah loh hram tur a ni a, pawn-a chhuak tur reng reng ten hmai tuam ngei tur a ni ang.

School, College, Educational leh Coaching Institution te chu khar chhunzawm an ni anga, Online Distance Learning erawh kalpui chhun-zawm theih a ni a. September ni 21, 2020 hnu lama kal dan tur inkaihhruaina chu a hranpa in siam a ni ang. Sakhaw biakna hmunah te chuan mipui punkhawmna huaihawt phal ala ni lova, Zing tawngtai inkhawm erawh chu mi 50 aia tamlo tan neih phal a ni a, mipui ten a hmuna an en theih tur Games & Sports Tournament huaihawt phal la ni lovin entu awm lova practice neih erawh phal a ni chungin mi 25 aia tam punkhawm phal a ni lo.

Mitthi vuinaah pawh a hmaa kalpui dan a la kalpui tur a ni dawn a, Bazar, Dawr, Petrol Pump, Filling Station leh sumdawnna hmun te ‘Social Distancing’ kengkawh chunga kalpui zui tur a ni a, mi pathum aia tamin dawr pakhat an nghah phal a ni lova, Wholesale dawr leh dawr lian (Departmental Store)-ah te erawh chuan mamawh dan azirin Godown/Store lama thawktu nen mi 6 (paruk) thleng an chhawr thei anga. Dawr neitute chuan anmahni Dawrtute Hming, Address, Contact Number leh an dawr hun chhinchhiahna record fel takin a vawng tur a ni bawk anga. Dawr zawng zawng chu (damdawi dawr tiam lovin) tlai dar 7:00 hma-in khar vek tur a ni bawk ang.

Nizan hmasa a sawrkar in inkaihhruaina a tihchhuah zawmlo te chu Dan anga hrem theih an nih tur thu he thupek ah hian tarlan tel nghal a ni bawk.