Sawrkar thil lei duhsak zawngte vulhna ah ngai

Congress Thalai, Mizoram Pradesh Youth Congress Committee (MPYCC) chuan Mizoram Sawrkar-in Wireless Radio System Set khat to taka a lei chu hripui denchhena duhsak zawngte vulhna niin an sawi.

Nimin a thuchhuah an siamah MPYCC chuan kumin June ni 10 khan Purchase Committee Meeting on Mizoram State AYUSH Society chuan COVID-19 dona atana hman turin Wireless Radio System Set khat lei an rel thu leh hemi supply thei awmchhun nia an sawi B.L Wireless System, Ramhlun Venglai chuan Rs. 12,40,000/- in Set khat a supply tih tarlangin, B.L. Wireless System chauh lo Mizo thalai tam tak hian Wireless Radio System hi cheng nuai tam taka tlawm zawkin an supply thei tih an tarlang a. Hetianga hripui leng denchhena a ruka rala sum siam nana Mizoram Sawrkarin hma a la ta fo chu thil tenawm tak a ni tih tarlangin, Wireless Radio System Set Mizoram Sawrkarin a chah nia tarlan leh rate chu a to uchuak hle niin an tarlang a. “Hripui len laia chhungkaw pa ber pawhin mahni thla khat hlawhte hripui do nana an pek thak thak laia hetianga hlep tam uchuak taka a ruka Sawrkarin mimal hnena Wireless Set a lo supply-tir hi mipui zahlohna leh hripui denchhena duhsak zawngte vulhna a ni tih chiang takin a pholang,” an ti.

MPYCC thuchhuah chuan Mizoram Sawrkar chuan mipui thawhkhawm CM's Relief Fund atangin mipui zirtirna thleng phak hauh lo tur Pamphlet chu cheng nuai 10 lai sengin tute emaw a lo siamtir tawh nia tarlangin, hei hi duhtawk mai lovin AYUSH hnuaiah vek cheng nuai 10 seng bawkin a lo siamtir leh niin an tarlang a. “Tangkaina nei tak tak lo duhsak zawngte sum siamna atana Sawrkarin hripui leng hmanga remchanna laa hma a lo la ru zel hi mipui hmaah sawifiah zel turin kan phut. Congress Thalai chuan Mizoram Sawrkar chu hripui leng denchhenin mimal suma induhsakna uchuak nei tawh lo turin kan chah a ni,” an ti bawk.

Comments

Chhiar Hlawhte