Mizoram-a naupiang punna tlahniam nasa

Kum 10 kalta chhung khan Mizoram-a naupiang punna chu minus (-) 6.76% a ni a. Kum 3 kalta chawhrualin Mizoram-ah Buddhist an pung chak ber.

Mizoram Civil Registration record atanga a lan danin kum 10 kalta, 2009 atanga 2019 chhunga Mizoram-a nau piang punna (Decadal Growth) chu minus (-) 6.76% a ni a. Population punna a hniam zawnga a kal hi ram leh hnam tan hmasawn zelna kawnga dinhmun him loah a ngaih theih niin Assembly Session neih zawh taka Lawmawma Tochhawng zawhna ziaka Chief Minister leh Planning Minister ni bawk, Zoramthanga chhanna ah tarlan a ni.

Mizoram-a naupiang chhinchhiah zingah kum 3 kalta (2017 atanga 2019) chhung khan chawhrualin Buddhist Sakhua an pung chak ber a, an punna zat chu 12.19% a ni a, Hindu-in dawtin 12.19% a ni. Hetihlai hian Kristian Sakhaw zinga nau piang punna chu 5.08% a ni thung.

Kum 10 kalta 2009-2019 chhunga mitthi zat punna (Decadal Growth) chu 11.17% a ni a, hei hi naupiang zat punna aiin a tam zawk hle a. Mitthi zingah hian kum 15 atanga 64 an tam ber a, mitthi zawng zawng atanga chhutin zaa 57 an ni. Mithiam te chhut danin kum 15-64 inkar hi hnathawk thei rual an nih avangin thi an tam chuan kan ram tan a him lo thei hle dawn a ni. Mizoram-a mitthi, mipa leh hmeichhia dinhmun thlirin kum 10 kalta 2009-2019 chhungin mipa 1000 zelah hmeichhia 648 thi an awm a. Hei hian Mizoram-ah hmeichhia aiin mipa an thi hnem zawk hle tih a tarlang bawk.