Mizoram-ah COVID-19 hri kai mi 9 hmuh belh an ni

Darkar 24 kalta chhung khan Mizoram-ah COVID-19 hri kai mi 9 hmuhchhuah belh leh an ni a, heti hian Mizoram-a COVID-19 hri kai hmuhchhuah chu 1123 an tling ta.

Niminpiah khan ZMC Laboratory-ah sample 366 enfiah niin hri kai 6 hmuhchhuah a ni a, Rapid Antigen Test hmangin COVID-19 positive thar 3 hmuh-chhuah a ni bawk.

Niminpiah a ZMC Laboratory atanga hri kai hmuhchhuah te hi Aizawl District leh Kolasib District-a Sample lak pathum (3) ve ve niin mipa 5 leh hmeichhia pakhat an ni a, Aizawl District-a positive hmuhchhuah tharte hi Mizo-ram Police, Beraw CCC-a Security Duty (Frontline Workers) an ni a, hri kai tawh te nen lo inkawmhnaih atanga hri kai an nih rin a ni. Kolasib District-a hri kai hmuhchhuahte hi North Chal-tlang khua a cheng hmeichhe naupang kum 2 a upa, August 29, 2020-a Tripura atanga lo kir, Quarantine Facility a awm mek leh Assam (Hai-lakandi leh Katlicherra) a cheng mipa pahnih, Thingdawl Quarantine Centre a awm mek an ni bawk.

Niminpiah-a Rapid Antigen Test hmanga COVID-19 hri kai hmuhchhuah pahnih te hi Kolasib District-a hri kai hmuhchhuah niin State pawn atanga lirthei rawn khalhtute an ni a, midang pakhat hi Serchhip District mi, Jammu & Kashmir atanga chawlh hmang tura rawn haw a ni thung.

Hetihlai hian nimin khan Mizoram-a hri kai enkawl mi 13 te chu enkawl damin chhuah-tir an ni a, heng mite hi ZMC atangin mi 7, Darlan CCC atangin mi 5 leh Lawngtlai CCC atangin mi pakhat te an ni a, heti hian Mizoram a hri kai hmuhchhuah 1123 atangin mi 745 te chu enkawl dam an ni tawh a, mi 378 te chu la enkawl mek an ni thung.

India-ah hri kai hmuhchhuah tlahniam hret :

India ramah darkar 24 kalta chhunga COVID-19 hri kai hmuhchhuah tlahniam hretin darkar 24 kalta chhung khan hri kai 75,809 hmuh an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 10,98,621 enfiah lehin heng atang hian hri kai 75,809 hmuh niin India rama Sample enfiah 5,06,50,128 atangin hri kai 42,80,422 hmuh an ni tawh a, sample enfiah atanga 8.45 te chuan hri hi an kai a ni. India rama hri kai atang hian mi 33,23,950 chu enkawl dam ni tawhin tunah hian hri kai enkawllai 8,83,697 an la awm a, India rama hri kai hmuhchhuah atanga zaa 77.65 te chu enkawl dam an ni tawh a ni. Hetihlai hian India ramah hian hri kai avanga nunna chan pawh mi 72,775 zet an awm tawh bawk a ni.

Comments

Chhiar Hlawhte