Saizawh West khuaa buaina thleng ah CYCA ten ngaihdam dilna thuchhuah an siam

Ningani kalta a Mizoram chhimlam, Saizawh West-a buaina thleng chungchangah Central Young Chakma Association (CYCA) chuan ngaihdam an dil.

Ningani kaltaa Chakma Autonomous District Council huamchhung, West Saizawh khuaa thil thleng chungchangah hian Inrinni khan Central Young Chakma Association (CYCA) Publicity Secretary, F. Darpan Chakma chuan thuchhuah siamin Saizawh khua a thilthleng hi vanduaithlak an tih thu leh an dem thu a sawi a. He thil thlenga hliam tuar Mamtea leh a chhungte, Saizawh khaw mite leh Mizoram mipuite lakah ngaihdam dilin, Mizo unaute rilru an tihnat avangin pawi an tih thu leh he thil thlenga mawhphurtu ni a puhte chu Police-te'n man vek tawhin Lawngtlai District Jail-ah dahluh an nih tawh thu a tarlang a. Tun hnu ah hetiang thil hi a thlen tawh lohna tura hmalak an tum thu sawiin, Social Media lama chi leh chi inkara boruak thalo zawnga thu thehdarh lo turin mitin an ngen bawk a ni.

He buaina thleng avanga Saizawh West-a kal MZP General Hqrs. hruaitute chuan Inrinni khan Saizawh West-a NGO leh Young Chakma Association (YCA) te chu Chawngte 'C' a MZP Pisa-ah thutkhawm an neihpui a. Saizawh West te nen an inkawmna ah MZP General Hqrs. President, B. Vanlaltana chuan Saizawh khuaa cheng Zohnahthlak awm mek te chu Mizote tan ral hmatawng leh kan ram neihchhun zimte venghim tu an ni tih sawiin, Chakma misualte laka zamlo a, huaisen taka lo dolet zel turin leh an thlavang hauh tura Mizo thalaite tam tak an awm thu a sawi bawk.

Hemi hnu hian Young Chakma Association(YCA) hotu kawm chhunzawm lehin MZP President chuan Mizote hian Mizoram chhunga hnamdang te hi kut an thlak ngawt ngaihloh thu leh an diriam ngawt ngai loh thu sawiin, Hnamdang- Takam, Tuikuk leh Vai te zawkin a ram neitute zawk kutthlak a, thisen chhuah mai duh tawk lovin nunna hial an lak sak thin thu a sawi a. Sept. 3, 2020 tlai lama thil thleng chu MZP chuan a hriatthiam loh thu leh a dem thu sawiin, a tul ang zelin sawrkar laipui thlenga thlen a nih tur thu a sawi bawk.

MZP hruaitute chuan CADC Chief Executive Member, Rasik Mohan Chakma pawh a chenna In-ah hmu nghalin, he thil thlenga Mizo tlangvalin Chakma kut a tuar chu MZP te'n an hrethiam thei dawn lo tih sawiin, CEM a nihna anga mawhphur ngam tur leh hliam tuar pawh CADC in zangnadawmna pe nghal turin an hriattir a. CEM chuan MZP te ngenna angin CADC chuan hliam tuar hnenah Rs. 50,000/- an pek tur thu MZP hruaitute a hrilh niin MZP thuchhuah chuan a tarlang a ni. MZP hian Chawngte-ah hian Chakma pawn chhuah an khap avangin Dawr leh Office te khar vek a ni bawk.