Assam Rifles ten YMA-ah ngaihdam dilna an thlen

Assam Rifles mi leh sa thenkhatin Vairengte Check Gate an paltlang luih chungchanga Mizo mipui hnena ngaihdam dil tura Central YMA in an phut angin Inrinni khan Assam Rifles chuan Central YMA ah ngaihdam dilna an thlen.

Central YMA hruaitute sawi danin Assam Rifles te hian Inrinni chhun dar 12:50 khan Central YMA-ah ngaihdam dilna hi an thlen a, “Mizo mipuite rilru kan tihnat na ah ngaihdam kan dil e,” an tih bakah tun thil thleng avanga boruak thalo awm lova thawhho zel an duh thu an sawi bawk niin Central YMA hruaitute chuan an sawi.

Tarlan tawh thin angin Central YMA hian Assam Rifles-te chu an mi leh sa te August 15, 2020 tlai dar 4:00-a Sesih khuaa hmeichhe feh haw te an zahawmna tibawrhbáng záwnga an chêt avang leh, Mizoram sawrkarin COVID-19 laka himna tura thupek a siam pawisa lova an paltlang luih avangin August thla chhung ngeia ngaihdam dil turin an lo phût tawh a, Assam Rifles 23 Sector DIG leh a hote pathumin tawngkaa ngaihdam an dilna leh Mizoram-ah AR Director General a rawn kal dawn avanga September ni 5 thleng ngaichâng tura an ngen angin Inrinni khan ngaihdam dilna hi an dawng ta a ni.

Central YMA chuan tunhnaia Saizawh West hmuna Mizo pawisawilo te, Takam  hoten kut an thlak chu an dem takzet tih pawh sawiin, pawisawi lo kutthlaktute chu dan anga hremna a na thei ang ber pe turin sawrkar an phut tih an sawi bawk.