Latest News

Hri kai hmuhchhuah tam lamah India 2-na a ni ta

India chu khawvel ram hrang hrang zinga COVID-19 hri kai hmuhchhuah tam lamah pahnihna a ni ta a, nimin khan Brazil chu a khum a ni.

Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai mi 90,632 zet hmuhchhuah an awm a, hei hi nikhat-a hri kai hmuhchhuah an tam ber ni niin nikhat-a hri kai sing kua chuang hmuhchhuah an nih hmasak ber a ni bawk a, heng te nen hian India ramah he hri kai hmuh-chhuah chu mi 41,13,811 an tling ta a, hri kai hmuhchhuah tam lamah India chuan Brazil lehpelin pahnihna dinhmun a luah a, hri kai hmuhchhuah tam berna chu United States a ni mek bawk.

India ramah hian COVID-19 hri kai hmuhchhuah hi an pung nasa viau a, a tir lamah hri kai hi pung chak vak lovin hri kai nuai 10 an tlin chhung kha ni 59 zet a ni a, hri kai in nuai 10 an tlin,  July 17, 2020 atanga ni 21 (August 7, 2020) chhungin hri kai hi nuai 20-ah kai hmanin hemi atanga ni 16 hnu, August 23, 2020 khan hri kai hi nuai 30 an tling leh a, hemi atanga ni 13 a liam hnu, Sept. 5, 2020-ah chuan hri kai hi nuai 40 an tling hman tawh bawk a ni. India tihloh ramdang in nikhat-a hri kai an hmuhchhuah tam ber July 17, 2020 khan United States chuan nikhat-ah hri kai 77,255 an hmuchhuak a, hei hi India chuan tum 8 lai a khum tawh bawk a. Tunhnaiah nunna chan pawh pung zelin ni 5 chhung chu mi sangkhat aia tam a zawnin an thi tawh bawk a ni.

India-ah COVID-19 hri kai nuai 41 an tling tawh :

India rama COVID-19 hri kai hmuhchhuah chuan nuai 41 an tling ta a, darkar 24 kalta chhungin hri kai 90,632 zet hmuhchhuah leh a ni bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 10,92,654 enfiah leh niin heng atang hian hri kai hmuhchhuah 90,632 an awm leh a, heng te nen hian India ramah Sample 4,88,31,145 enfiah ni tawhin hri kai hmuh zawng zawng chu 41,13,811 an tling tawh a, India rama Sample enfiah atangin zaa 8.30 te chuan hri hi an kai a ni.

Darkar 24 kalta chhung khan India ramah hri kai 73,642 chu enkawl dam niin hri kai enkawl dam zawng zawng chu 31,80,865 an tling tawh a, hei hi hri kai hmuhchhuah atangin zaa 77.32 niin tunah hian hri kai enkawllai 8,62,320 an la awm mek a ni. India ramah hian hri kai hmuhchhuah zingah nunna chan pawh 70,626 zet an awm tawh bawk a, darkar 24 kalta chhung khan nunna chan hi mi 1,065 an awm leh bawk a ni. ICMR chhinchhiah danin tun dinhmunah India ramah COVID-19 hri kai enfiahna (Laboratory) 1652 a awm mek a, heng te hi Sawrkar Laboratory 1027 leh Private Laboratory 625 te an ni.

Comments

Popular News (Last 30 Days)