LENKAWL ADS (Revenue) :

PMAY(U)-CLSS sawiho a ni

Nimin khan Kolasib-ah District Bawrhsap, Dr. H. Lalthlangliana kaihhruaiin Pradhan Mantri Awas Yojana (PMAY)-Credit Linked Subsidy Scheme (CLSS) hnuaia loan pekchhuah dan tur chungchang sawihona hun neih a ni a, he huna tarlan a nih danin kum 2019-20 chhung khan Kolasib District-a loan pekchhuah zat tur bituk zat 190 a nih laiin 68 pekchhuah a ni a. Kolasib khawchhung Bank atangin 44, Kawnpui atangin 21 leh Vairengte MRB atangin 3 pekchhuah a ni. Bank hrang hrang zinga loan pekchhuah tur bituk zat pechhuak hi Kawnpui MRB chiah a awm a, 20 bituk an nih laiin loan 21 an pechhuak a ni. Bituk zat atanga chhutin PMAY(U)-CLSS loan pekchhuah hi za zelah 35.79 ang vel a ni. He hunah hian kum 2020-2021 chhunga Loan pek leh dan tur sawiho niin mi 190 Loan pe tura rua-hman a ni a, dilna 119 lut tawhin pawm tlaka ngaih chu 82 chauh a ni thung.

Hnahthial-ah Heroin man

Hnahthial Police leh Hnahthial Chanmari Branch YMA te tangkawp chuan nizan hmasa khan Hnahthial leh Tarpho inkar Tuichang lui bulah Heroin No. 4 Hawng 19 leh a phurhna bike (MZ-01/L-6305) chu an man a, Heroin rawn kengtu J. Rothangliana (29) leh Lalnunpuia (30), Hnahthial Venglai ve ve te pawh man nghal niin thubuai siam sak nghal an ni. Heng Heroin an man te hi tualchhunga hralhna rate-ah chuan Rs. 8,55,000/- hu vel nia chhut a ni a, tunhnai ni 24 chhungin Hnahthial Police te hmalakna hnuaiah ruihhlo leh a kaihhnawih Rs. 91,41,000/- hu zet man a ni tawh a ni.

CM Relief Fund dinhmun

Mizoram-a COVID-19 hri leng mek dona atan nimin thlenga Chief Minister's Relief Fund for COVID-19 a sum lut tawh zat chu cheng vbc. 21.01 a tling tawh a, Committee on Utilization of CM Relief Fund for COVID-19 ruahmanna anga hman tawh chu Rs. 19,34,48,588/- niin sum hmanbang vbc. 1.66 ala awm bawk.

RT-PCR bunna tur enfiah

Lunglei Civil Hospital-a RT-PCR khawl bun theih dan tur chu nimin khan Lunglei HPC Vice Chairman, Lawmawma Tochhawng leh Dr. K. Pachhunga MLA bakah Lunglei Medical Superintendent te chuan an en a, he huna tel te hian Lunglei Civil Hospital building chu khawl dahna atan hman mai theih a nih loh avangin a Compound chhunga OPD Complex hnung lam, ram ruak chu RT-PCR khawl dahna building sakna atan sawrkar-ah rawtna thehluh nise an ti a, helai hmun hi Hospital nen innek buai lova building hran sak theihna tur niin Building sakna tur hian estimate siam nghal tur niin sawrkar hotute hnenah thlen a ni ang.

Mumbai pan rihloh a him

Mumbai Mizo Association chuan eizawnna hna leh zirna avangin Mumbai pan mek leh pan tum hnai Mizote zingah kan awm chho leh tan ta tih sawiin, chutihlaiin Mumbai chu India rama hripui (COVID-19) hluar lawr lakna hmun a ni tih an sawi a. Hei hi tuna Mum-bai dinhmun a nih avangin boruak a pangngai deuh hma chu Mumbai pan rihloh chu kan him tlanna tur nia an hriat thu sawiin, laklawh thil leh tulna bik avanga Mumbai pan tur kan awm a nih chuan Mumbai Mizo Association hruaitute hnenah thurawn la hmasa tur leh awm zui turte chu MMA-a inziaklut ngei turin an ngen bawk.

Motor lut tur dan titawp

Silchar Truck Driver Association (STDA) chuan an member COVID-19 vei, Mizoram-a enkawl an nihna hmun atanga chhuahtir phûtin Inrinni kalta, September 12 atang khan Lailapur-ah Mizorama lut tur bungraw phur lirtheite an dang a. STDA hian September 10, 2020 khan Silchar Mizoram House-a Liason Officer hnenah lehkha thawnin, Mizoram CCC-a awm ten ei tur an dawng tha lo nia sawiin, tharum hmanga beih an ni tih an tarlang a. An member-te chu hun rei tak chhung CCC-a an awm hnuah pawh chhuahtir dan tur District Administration-in an ngaihtuah lo nia sawiin, CCC-a rei tak an awm avangin sum leh pai-ah an chhungte'n harsatna an tawh phah niin an sawi bawk.

Hetianga bungraw phur lirthei te dan a nih hnu nimin khan Thingdawl CCC-a driver leh handyman 72 te chu hri lakah fihlimin chhuahtir an ni a, lirthei dan pawh tihtawp nghal a ni bawk.

Champhai-ah TrueNat Laboratory hmang tan

District Hospital Champhai-a Mini RT-PCR (TrueNat Quattro) Bio-Safety Level-2 Laboratory bun thar chu nimin khan hman tan a ni. Champhai District Hospital-a TrueNat Laboratory hi Dental OPD Building tura ruahman, In maldin chei danglama siam a ni a, he Laboratory-ah hian RNA Extractor 2 leh Analyser hmanga darkar khat vel chhunga test-te zawhfel hman theih beisei anih thu leh hmundang atanga lo haw te ni 5 hnuah sample laksak an nih thin thu te tarlan a ni bawk. Thla hmasa August 26, 2020 khan Covid-19 veite phurhna tur Ambulance lian Tata Winger, a chhung Air Condition vek chu Mizoram sawrkar atangin District Hospital Champhai hian a lo dawng tawh bawk a ni.