MNF sawrkar ah Assam Rifle an inluling tih sawi

Mizoram Assembly-a Congress Member, C. Ngunlianchunga chuan MNF sawrkar hnuaiah Assam Rifle an inluling hle nia sawiin, Mizoram Police-te zahawmna humhim tura hma la tura sawrkar a phut thu a sawi.

Nimin-a Statement a siamah C. Ngunlianchunga chuan MNF sawrkar hnuaiah Mizoram Police-ten zah an kai tawk lo nia sawiin, tunhnaiah ringawt pawh Assam Rifle lamin vawi engemawzat Mizoram Police te hmalakna an palzut niin a sawi a. September 10, 2020 zan dar 11:00 khan Mizoram Police, Sangau Post-a awm ten Indo-Myanmar Border, Archhuangkai-ah dan lova Mizoram a phurhluh Kuhva rah bag 550 an man chu Dan ang taka man a nih angin, Court a thehluh tur Seizure List pawh fel taka siam vek a ni tih a sawi a. Hetihlai hian heng Kuhvarah te hi Siachangkawn-ah 17th Battalion Assam Rifle duty te’n zing dar 1:00 velah lo man nawn lehin, Mizoram Police hnen atangin an chhuhsak tih a sawi a. Lawngtlai SDPO-in Bualpui OC a tir chungin Assam Rifle lam nen an inbe rem thei lova, Mizoram Police lam hi an inthiarfihlim ta zawk a, Kuhvarah te pawh Assam Rifles lam hian Lunglei-ah phurin Assam Rifle man angin chanchinthar-ah puanzar a ni zui ta nghe nghe tih a sawi.

MNF sawrkar hnuaiah Assam Rifle an inluling nasa hle nia sawiin, Mizoram Police-te leh Mizo mipuite zah lo taka min palzut fo tih Ngunlianchunga chuan a sawi a, he thil a thlen hma hian Vairengte-a COVID-19 Testing Check Gate-ah Mizoram Police-te palzutin an lo tlan tlang lui tawh a, Zokhawthar lamah Mizo sumdawngte bungrua vawi tam tak man sakin, an lo buai phah tawh bawk tih a sawi a. Assam Rifle-ten MNF sawrkar an ngam em em mai chu a mak hle nia sawiin, sawrkarin Mizoram Police leh mipui thlavang a hauh nat ngam loh vangah a ngaih thu a sawi a. “MNF sawrkar hnuaiah Mizoram Police-te zahawmna nasa taka a tlahniam ta hi a pawi ka ti takzet a ni,” a ti bawk.