Serchhip Town VC Joint VC din niin VC hming-a number la awm thlak rel a ni

Village Council inthlanpui neih zawh a nih hnua Serchhip Town chhung Village Council hrang hranga VC thlan thar te chu nimin khan thukhawmin Serchhip Town Joint VC din lehin hruaitu tur thlanna an nei nghal.

Village Council Term liamta a Serchhip Town Joint VC kaihhruai hna thawk mektu Serchhip-VIII VC te huaihawtin VC inthlanpui neih zawh taka Serchhip Town chhunga VC thlan thar te inhmuhkhawmna hi nimin chawhma dar 11:00 khan P&E Veng YMA Hall-ah neiin Serchhip-VIII VCP, C. Vanlalsiamthara chuan a kaihruai a, Serchhip khawpui chhung VC hrang hranga thendarh a nih hnuah Joint VC alo din chhoh dan leh an kalphung tlangpui te he hunah hian tarlan niin he huna tel te hian khawtlang huapa hmasawnna hna thawh a nih theih nan leh a tul anga hmalak ho zel a nih theih nan Serchhip Town Joint VC hi din leh nise an ti a ni.

He hunah hian Serchhip Town Joint VC kalphung tur pawh sawiho nghal niin Joint VC kaihhruai hna hi VC member ten kum khat chhung atan thlan thin nise an ti a, hemi ang hian kum kal meka Serchhip Joint VC hruaitu tur thlanna hi neih nghal niin Chairman-ah Lalzuiliana, Serchhip-IV, Secretary-ah K. Laldaihvela, Serchhip-IV leh Treasurer-ah B. Lalthuami, Serchhip-VIII te thlan an ni a, heng mite hian nimin vek khan Joint VC kaihhruai hna hi an thawk tan nghal a ni.

Hetianga Joint VC hruaitu mawhphurhna inhlan fel a nih hnu hian Serchhip Joint VC Chairman, Lalzuiliana kaihhruai hian thutkhawm neih chhunzawm leh nghal a ni a, an thurel zingah Serchhip khawpui chhunga VC hrang hrang zinga VC hming-a number la hmanna awm te chu a huamchhunga Veng lian ber emaw, Veng mal hming emaw a put theih nan hmalak tha tiin hemi chungchang hi sawrkar thuneitute hnenah thlen nise an ti a. MGNREGS hnuaia mipuite sum thawhkhawm thin dan chu mipuite rawn tura Gram Sabha neih ala remchan loh avangin VC hmasa ten an lo kalpui thin dana kalpui ve rih nise an ti bawk. Hei bakah hian Joint VC inrelbawlna hrang hrangte pawh he hunah hian sawihona neih zui nghal a ni bawk. Nimin a Serchhip Town chhunga VC hrang hrang inhmuhkhawmna ah hian mi 60 vel telin VC hrang hrang aiawh an tel kim nia thudawn a ni.