North Vanlaiphai-ah Rashtriya Poshan Maah hmang

Sawrkar laipui in ruahmanna a siam angin Serchhip District KVK, North Vanlaiphai chuan nimin khan ‘Rashtriya Poshan Maah, 2020’ (National Nutrition Month) leh Agricultural Seminar chu North Vanlaiphai Bangla Veng Kohhran Hall-ah an hmang.

North Vanlaiphai-a he hun hman hi North Vanlaiphai SDO (Civil), Dorothy Muansangi chuan khuallian nia hmanpuiin Anganwadi Centre hrang hrangte tana Chuktuah huan neih a pawimawh thu leh a tangkai dan te sawiin, hemi kawngah hian hmalak a tul thu leh he Programme in a tum ang ngeia Anganwadi Workers te pawhin hemi kawngah hian hma an lak a pawimawh thu a sawi bawk a ni.

Nimin-a he hun hman hi KVK North Vanlaiphai-a Subject Matter Specialist (Agronomy), Kenny Zohmingliana chuan kaihruaiin East Lungdar ICDS Project hnuaia Anganwadi Workers 11 te bakah MHIP atangin Farm Women 9 an tel bawk a, KVK-a Senior Scientist & Head, Dr. T. Vanlalngurzauva chuan Rashtriya Poshan Maah tobul leh a thil tum te sawiin, tunlai COVID-19 hri leng kara he programme pawimawh lehzualna te a sawi a, MGNREGA leh he Programme hi Central pawhin kalkawppui a rem tih thu sawiin, VCP leh a thawhpuite pawh hemi kawnga rilru zau tak seng a, ruahmanna nei turin a sawm bawk.

He Programme hi ICAR-KVK leh IFFCO te tangkawpina an buatsaih niin Mizoram-ah chuan KVK ten an kalpui a, chawhnu lamah Technical Session hmangin mithiam ten thupui hrang hrang hmangin kalkhawmte zirtirna an pe a ni.