Damdawi In sakna tur hmun rawtna ziakin thlen

Serchhip District NGO Coordination Committee chuan nimin khan Serchhip District Deputy Commissioner hnenah Bukpui-a P&E Department ram leh ITI Building sakna inkar chu District Hospital sakna atan an pawm thu ziakin an thlen.

Niminpiah tlai-a Serchhip District NGO Coordination Committee huaihawta Serchhip Joint VC hruaitute bakah tlawmngai pawl hrang hrang leh Serchhip Town chhunga VCP 14 zinga 12 te kalkhawm in Serchhip District Hospital sakna tura rawtna an siam chungchanga thutlukna an siam angin nimin khan Serchhip District NGO Coordination Committee chuan Serchhip District Bawrhsap hnenah Serchhip District Hospital Building thar sakna hmun atan Chhiahtlang ramchhung, Bukpui hmuna P&E Department ram leh ITI hmun tura buatsaih mek inkar, Vantlang ram awl (Free Land) chu an pawm thu ziakin an thlen a. He lehkha an thehluh ah hian kan mamawh leh nghahhlelh em em District Hospital Building thar, khum 100 awm theihna tur sak vat a nih theih nana chak taka hma la turin an ngen nghal bawk a ni.

Chhiahtlang-a VC te chuan tuna Ser-chhip District Hospital sakna tura ruahman leh a chhehvel hi Mizopa chhut dan chuan Tin 5 hmun vel zeta zau tura ngaih a nih thu an sawi a, tunhma lama B. Bukpui M/S awmna thin leh a vel te a huam vek thu sawiin, hemi bula Field awm te pawh a huam vek thu an sawi a. Damdawi In hmun atana ram pek tur chin erawh a hmuna la enfiah tur nia an ngaih thu sawiin, damdawi In atana ram mamawh tur ang chu leng vek tura an ngaih thu an sawi bawk.

Helai hmun hi a hmalam pawhin Adviser to Chief Minister, C. Lalramzauva hova an lo en tawh thu leh hetah pawh hian thuneitute chuan a ram chu zau tha an tih thu leh Hospital atana ram mamawh tur ang chu leng vek tura an ngaih thu an sawi tih an sawi bawk.

Comments

Chhiar Hlawhte