MSU in ‘Zo Hnam Chhan Ni’ an hmang dawn

Mizo Students’ Union (MSU) chuan kumdanga an lo hman thin angin ‘Zo Hnam Chhan Ni’ chu kumin hian September 11 khian hman leh nise an ti.

MSU General Hqrs. hian nimin khan Aizawl-ah Executive Committee Meeting vawi 17-na neiin September thla Zirtawpni vawi hnihna-a an lo hman thin ‘Zo Hnam Chhan Ni’ hi kumin ah hman leh nise tiin September ni 11, 2020 hian Mizo mipui zawng zawngte chu hnamdang dawr lo turin an ngen a. Hemi ni hian Mizoram hmun hrang hranga Hnamdang dawr zawng zawngte chu inkhar vek tura hriattir nghal niin, lo inhawng lui te chungah eng harsatna pawh thleng se MSU in mawh a phur lovang tih an sawi a. Zo Hnam Chhan Ni pual hian Chawngte khua ah NGO Consultation Meeting neih a ni bawk ang.

Hei bakah hian MSU chuan School Education Department Director post chu IAS post a nih angin Director-ah Mizo IAS ngei dah an phut thu pawh sawiin, Mizo zirlaite hmakhua ngaihtuah chungin a rang thei ang ber a dah thuai turin sawrkar chu an ngen a. Irrigation & Water Resources Department kaltlanga National Hydrology Project (NHP) hnuaia Chemist hnalak tur chungchangah thil fel tawklo a awm avangin he hna lak hi kaltlang puilo turin sawrkar chu an ngen tih an sawi bawk.