Mizo hnam ziarang leh nunphung ah hian midang tan entawntlak tak tak a awm - Chief Minister

Chief Minister, Zoramthanga chuan Mizo hnam ziarang leh nunphungah hian midang tan entawntlak tak tak a awm thu sawiin, COVID-19 hrileng karah pawh State dangte nen khaikhin chuan Mizoram chu hma la tha ber a nih thu a sawi bawk.

Kum 2020 Chapchar Kut post Souvenir ‘Nghilhloh Bu’ tlangzarhna inkhawm nimin a CM Conference Hall-a neih ah he thu hi sawiin Chief Minister, Zoramthanga chuan Chapchar Kut chu kan Culture min thuikhawmtu zing a pawimawh tak a ni tih sawiin, sawrkar atang pawhin hetah hian pawisa awm ang ang atangin tlin chin chin hman a lo ni tawh thin tih a sawi a. State dang pawhin an Hnam ziarang chawisanna Cultural Festival theuh an lawm thin angin Mizote pawhin kan Kut pawimawh hi ropui takin hman atanga kan lo lawm tawh thin thu a sawi a. Culture hian hun kal zelah hma a sawn ve zel tih pawh Chief Minister chuan sawiin, midang tih dan la a pawlhdal lam nilovin, amah hi a thang in hma a sawn zel angin kan Culture phochhuahna ber Kut kan lawm dan pawh hian hma sawn ve zelin, State dang leh ramdanga kan unau te tan pawha chhim manhla lehzuala siam a pawimawh thu a sawi bawk.

Chief Minister chuan Mizo hnam ziarang leh nunphungah hian midang tan entawntlak tak tak a awm thu sawiin, tun COVID hrileng karah pawh State dangte nen khaikhin chuan Mizoram chu hma la tha ber a nih thu a sawi a. Hei hi a chhan pawimawh tak chu mipui tanrualna leh tlawmngaihna te, inthununna nei tha kan nih vang nia a rin thu a sawi bawk.

‘Nghilhloh Bu’ tlangzarhna inkhawm tawi buatsaih hi I&PR Director, Lallianpuii chuan kaihruaiin, kumdang anglo takin kumin chu hrileng avang leh thil dang dang avangin Chapchar Kut lawm hnu lawka Souvenir tlangzarh tum chu a khawtlai phah tak thu a sawi a. Central YMA Asst. Secretary, Dr. Malsawmliana chuan report pein, Carol VLMS. Dawngkimi, Jt. Director, Art & Culture Department chuan lawmthu sawiin hun a khar a ni.

Chapchar Kut 2020 Souvenir tlangzarh tak hi phek 114 niin, thuchah leh Mizoram hmun hrang hranga kumin-a Chapchar Kut lawmna hlimthla engemawzat dah a nih bakah thuziak mi hrang hrang te ziak 13 a awm a. A vaiin copy 2600 siam a ni.

Comments

Chhiar Hlawhte