Tun dinhmunah Mizoram pumah COVID-19 hri kai te enkawlna hmun, COVID Care Centre (CCC) atana hman mek leh hman tura pawm 35 awmin, a ruala COVID-19 hri kai 1722 enkawl theihna tura hisap a ni a. Heng bak pawh hi a remchan anga hmundang dap belh mek a ni bawk.
Nimin khan Health Minister, Dr. R. Lalthangliana hovin Mizoram-a COVID-19 hri kai hmuhchhuahte enkawlna hmun, COVID Care Centre (CCC) indaihlohna phuhru tura hmalak dan thlirho pahin CCC kaihhnawih thil pawimawh chi hrang hrang sawiho a ni a. He thutkhawm ah hian Mizoram District hrang hranga CCC dinhmun tarlan niin, Aizawl District-ah CCC 18 awmin Khum 1042 dah theihna a ni a. Civilian 882 awm theihna CCC leh Paramilitary Force 160 awm theihna an ni. Aizawl District, a bik takin Aizawl khawpui leh a chhehvelah CCC mamawh belhna a san avangin sawrkarin kawng hrang hrangin hma a la a, tunhnaiah mi 480 awm theihna tur BSUP building, Durtlang leh mi 80 enkawlna tur Women's Polytechnic Hostel Old Building, Durtlang chu a hmunah kalin endik a ni a, a tul anga hmalak chhunzawm a ni ang. Kohhran leh YMA ten an hmunhma te CCC atana hman an phal thu dawn a ni mek zel chu he thutkhawm a tel te chuan lawmawm an tih thu an sawi a, heng hmunhma te CCC atana hman tura a him tawk leh tawk loh endik a ni ang. Mizoram University hotuten an hmunhma thenkhat CCC atana hman an remtih thu pawh he hunah hian tarlan niin Vawiin hian Health Minister hova enfiah a ni ang.
He thukhawm hian Mizoram chhunga CCC hrang hranga hnawmhnawk (Bio-Medical Waste leh General Waste) te senghawia tihral dan tur pawh ngaihtuah niin Sawrkar laipui atanga inkaihhruaina dan siamsa awm mahse kan State dinhmun thlirin kan tana tha ber turin ruahmanna siam nise an ti a, heng hnawmhnawkte hi phum bo (deep burial) zel dan tur ruahmanna siam tum a ni bawk.
Private Hospital-a TueNat khawl bun a Sample Test tir chungchang leh Rapid Antigen Test (RAgT) hmanga Private Hospital-a in test chungchang pawh sawrkarin a ngaihtuah mek thu tarlan a ni a, COVID-19 Testing Strategy siamthat a tul thu leh Testing Facility tih changtlun a tul thu tarlan a ni bawk.
COVID-19 Positive zinga hri kai lan-chhuahna neilo, Asymptomatic-te chungchang pawh he hunah hian sawiho niin ‘An dinhmun in a tlin a, khawtlang hruaitute pawhin rem an tih a nih chuan In lama inenkawl (Home Isolation) kalpui hi a tha zawk em?’ tih sawiho a ni a, uluk taka zirchian a nih hnuah rawtna siam a, ngaihtuah leh atan tih a ni a, hei bakah hian SOP for Children Under-18 on COVID-19 siam a nih thu leh sawrkar pawmpuina dil mek a nih thu tarlan a ni a, SOP for Vulnerable People pawh duan mek a nih thu tarlan a ni bawk.
Hei bakah hian AMC huamchhunga Lockdown kalpui mek chhung hian COVID-19 inkaichhawnna khaidiat (transmission chain) chhut chah hman beisei a nih thu tarlan niin hemi atan hian Contact Tracing Team, Sample Collecting Team leh ZMC Laboratory a thawktut en chhunzan zawma an thawh thu tarlan a ni a, an chungah lawmthu an sawi a. Hetih rual hian positive tharte an chhui chianna ah case tam ber chu mipuite fimkhurna kawnga kan inthlahdul deuh vang ni a a lan thu tarlan a ni bawk.
He thutkhawm ah hian Health Minister bakah hian Medical Operational Team on COVID-19 Leader, Dr. ZR. Thiamsanga MLA, leh Chief Secreatray Lalnunmawia Chuaungo bakah CCC kaihhnawih Department hrang hrang hotu lia nte an tel a. Anni bakah hian Mizoram Kohhran Hruaitu Committee (MKHC) leh Mizoram Joint NGO Co-ordination Committee hruaitute pawh an tel bawk a ni.
Comments
Post a Comment