MNF MLA ten Speaker hnena thu an thlen MPCC President in mipuite zahlohna niin a hria

Serchhip bialtu MLA Lalduhoma, MLA a nihna atanga paihthlak tuma MNF MLA-ten Speaker hnena an hek chu Mizoram Pradesh Congress Committee (MPCC) President, Lal Thanhawla chuan Mizoram mipui leh Serchhip bial mipuite zahlohna leh pawisak lohna lian tak nia a hriat thu a sawi.

Hemi chungchanga nimin-a Press Statement a siam ah MPCC President, Lal Thanhawla chuan kum 1987 MLA Election-ah khan MNF Party-in Election Commission of India (ECI) Registration a la nei lo tih sawiin, “Independent veka dingin, seat 24 lain MNF-in sawrkarna an siam a, an dinhmun hrethiam takin Congress leh PC Party khan kan pawm mai a, kan hekin kan thik buai hek lo. A hnu kum 1989 Election-ah Congress kan sawrkar a, MNF (D) pawhin Registration la nei lo mahse Independent-in an ding a, seat hnih an la a, an tlinna bial-ah te pawh anmahni tantute siam chhovin member thar neiin phur takin an lawmlut a. Ram tana thawkho kan nih avangin an dinhmun hrethiam takin, tha takin kan en a, tihchhiat emaw, hek emaw kan ngaihtuah lo, ram hmasawnna kawngah tha takin kan thawkho mai a ni,” a ti.

MPCC President chuan ZPM MLA kan tih maite pawh Independent a ding ni mah se, a hma atanga ZPM hming veka kal an nih tawh avang leh, Election Commission of India a Registration la nei lo an nih vang maia Independent a ding an ni tih an pawm thu sawiin, “Congress party tan ZPM chu hnawksak viauin lang mah se, mipui thlantlin an nih miau avangin Pu Lalduhoma leh a thawhpui MLA-te hi ZPM MLA-ah Congress Party chuan kan pawm thlap a ni,” a ti.

Lal Thanhawla chuan Dan bawhchhiatna lian tak a awm avanga MLA atanga inchawlh tirna a awm a nih chuan tu tan mah hriatthiam loh tur awma a hriat loh thu sawiin, “Amaherawh chu, thil kalphung langchiang sa reng, mipui pawhin an pawm thlap thil ching pawr lui a, ram leh hnam hmasawnna leh ram tana thil tha zawk tur ngaih-tuah vang pawh ni lo a, mahni thawhpuite paihthlak tuma hmalakna hi ka dem a. Politics hi thianghlim taka kalpui zel hi a tha ka ti a ni,” a ti a. Hetiang hi Mizoram-a politics kan kalpui dan tur nia a hriat loh thu pawh sawiin, “Mizo Kristian, Kohhran a rawngbawltute tan phei chuan midangte chhiatna tur ringawt ngaihtuaha hmalak hi thil tih loh tawp tur a ni,” a ti bawk.