Mizoram-ah darkar 24 kalta chhung khan COVID-19 hri kai 47 hmuhchhuah leh niin Mizoram-a hri kai hmuhchhuah zawng zawng chu 1760 an tling tawh a ni.
Niminpiah khan ZMC Laboratory-ah Sample 1381 enfiah leh niin heng atang hian hri kai 33 hmuh leh an ni a, heng te hi mipa 25 leh hmeichhia 8 niin heng zingah hian tunhnaia Aizawl khawpui Veng hrang hranga hri kai nen an inkawmhnaih atanga hri kai mi 31 zet an tel a, hri kai hmuhchhuah te hi Thuampui-ah mi 17, Edenthar-ah mi 8, Durtlang-ah mi 2 leh Khatla East, Bawngkawn, Zemabawk leh Bethlehem atangin mi pakhat theuh bakah 90th Bn. BSF atangin mi 2 te an ni a, hri kai hmuhchhuah zingah hian VISHAL dawr, Bawngkawn-a thawk mi 5 an tel a ni a, nimin khan Zarkawt-ah hri kai pakhat hmuh leh a ni bawk.
Niminpiah vek khan District hrang hranga TrueNat Laboratory-ah Sample 163 enfiah niin heng atang hian hri kai mi 12 hmuhchhuah leh an ni bawk a, heng zinga 11 te chu Lunglei District-a hri kai hmuhchhuah niin BSF Sipai mipa vek an ni a, State pawn atanga rawn lut niin midang hri kai pakhat hmuhchhuah hi Mamit District-a hri kai hmuh, West Bengal atanga rawn haw a ni thung.
Rapid Antigen Test hmangin niminpiah vek khan Sample 457 enfiah ni bawkin hri kai pakhat hmuh a ni bawk a, he hri kai hmuhchhuah hi BSF Sipai, State pawn atanga rawn lut niin Serchhip District ami a ni.
Heti hian nimin thleng khan Mizoram-ah Sample 68,340 enfiah atangin COVID-19 hri kai mi 1760 hmuhchhuah an ni tawh a, heng zinga mi 1103 te chu enkawl dam ni tawhin tunah hian hri kai enkawllai 657 an la awm mek a ni a. nimin khan hri kai zinga mi 13 te chu enkawl dam leh an ni bawk.
India ramah hri kai zaa 81.55 enkawl dam tawh :
India rama COVID-19 hri kai hmuhchhuah zawng zawng chu nuai 57 an tling tawh a, hri kai hmuhchhuah atanga zaa 81.55 te chu enkawl dam an ni tawh thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 11,56,569 enfiah leh niin heng atang hian hri kai 86,508 hmuh leh an ni a, heti hian India rama Sample enfiah zawng zawng chu 6,74,36,031 niin hri kai hmuh tawh zawng zawng chu 57,32,518 an ni tawh a, India ramah Sample enfiah atanga zaa 8.50 te chuan hri an kai tawh a ni.
India rama hri kai hmuhchhuah atang hian darkar 24 kalta chhung khan mi 87,374 te chu enkawl dam niin tun thlenga enkawl dam chu 46,74,987 an tling ta a, tunah hian hri kai enkawllai 9,66,382 la awmin hri kai hmuh-chhuah atanga zaa 81.55 te chu enkawl dam an ni tawh a ni. Darkar 24 kalta chhung khan India ramah hri kai nunna chan 1,129 an awm leh a, heng te nen hian India rama hri kai nunna chan chu 91,149 an tling tawh a ni.
Comments
Post a Comment