Chanchin thar thenkhat :

Rajya Sabha MP in thlen

Mizoram Rajya Sabha MP, K. Vanlalvena chuan nimin khan Union Minister of Tribal Affairs, Arjun Munda chu a Pisa-ah hmuin India danpui a Tribal List chungchang sawipuiin Memorandum a thehlut a. He hunah hian Rajya Sabha MP, K. Vanlalvena chuan North East State hrang hranga Tribal cheng te list chu India danpui-ah a in chawhpawlh nasat thu thlenin, Meghalaya leh Mizoram Tribal List chu engmah danglamna awmlo leh in ang chiah a nih thu te, Assam leh Manipur Tribal List ten an chawh chawrawi nasat thu te leh State kan nih hnu, kum 30 chuang liam tawh hnuah pawh Assam State a kan awmlaia Tribal List min la hmantir reng chu diklo a tih thu leh siamthat a tul thu te Union Minister hnenah hian a thlen a ni. Union Minister hian hun remchang hmasa berah Mizoram a rawn zin a tum thu Mi-zoram MP hi a lo hrilh a ni.

Lok Sabha MP in sawi

Mizoram Lok Sabha MP, C. Lalrosanga chuan niminpiah tlai khan Parliament thutkhawm ah Aizawl khawpui atanga Assam Rifles sawn-chhuah vat a tul thu a sawi. Parliament Fur thut-khawm ni hnuhnung ber, niminpiah tlai-a neih ah Mizoram Lok Sabha MP, C. Lalrosanga hian Aizawl khawpui atanga Assam Rifles hote an awmna tura buatsaih, Zokhawsang a sawnchhuah vat a tul thu a sawi a. Assam Rifles hote insawn-chhuak tura Ministry of Home Affairs in February 19, 2019-a thupek a chhuah chu kengkawh rang turin sawrkar laipui chu a ngen a ni. Mizoram Lok Sabha MP chuan Zokhawsang-a Assam Rifles hote awmna tur Building 327 sak zinga 289 zet an hnenah hlanfel tawh tih pawh sawiin, an awmna tur panna kawng pawh zawhfel a ni tawh tih a sawi bawk.

Insawifiah turin hriattir

MNF MLA 12 ten MLA atanga Lalduhoma bang tura Speaker hnena ngenna an thlen chung-changah nimin khan Lalduhoma ni ni 14 chhunga insawifiah tura hriattirna lehkha pek a ni.

Ex-MNA in chawimawina hlan

Ex-MNA General Hqrs. chuan nimin khan Aizawl-a Mizo Hnam Run-ah Mizo Hnam Sipai zinga Local Council leh Village Council-a thlantlin te lawmpuina hun an hmang a, he hun hi MNF Vice President, Vanlalzawma chuan khuallian niin a hmanpui a ni. Tun tuma VC leh LC inthlanpui ah khan Mizo Hnam Sipai zingah Local Council Member atan mi 7 leh Village Council Member atan mi 9, an vaiin mi 16 thlantlin niin lawmpuina thuziak an hlan theuh a ni.

ZLP in MNF MLA te ngen

Mizoram Legislative Assembly-a ZPM Legislature Party chuan MNF MLA ten an Legislature Party Leader disqualify tur Assembly Speaker hnenah lehkha an thehlut chuan a thawng hle tih sawiin, Assembly Session, mipui ten thutlukna dik an siam theihna atana hmanrua pawimawh berah Thudik hailan a nih zel an hlauh avanga hma la lova, thudik dinpui ngam tura insiam tha zawk turin MNF Minister-te leh MLA te an ngen thu an sawi bawk.