Mizoram Rajya Sabha MP in ngenna an thlen

Mizoram Rajya Sabha MP, K. Vanlalvena chuan Mizoram-ah ramhmul damdawi lam zirchianna Institution din turin a ngen.

Parliament thutkhawm neih mekah nimin khan Union Minister of Ayurveda and Homoeopathy, Shripad Yesso Naik Bill putluh, ‘The Establishment of The Institute of Teaching and Research in Ayurveda’ chu sawihona neih a ni a, he hunah hian Mizoram Rajya Sabha MP hian thu sawiin Mizoram State-a zaa 50 chu Forest a nih thu leh Forest-ah ramhmul damdawi awmsa tam tak kan neih thu te sawiin, hetiang ramhmul damdawi lam zirchianna Institution chu Mizoram-a din turin Central sawrkar leh a changtu Minister te a ngen a. Hei bakah hian Medicinal plant hmanga damdawi siamchhuahna tur Micro and Small Industry pawh Mizorama din turin a ngen bawk a ni.