Mizoram-ah COVID-19 hri kai mi 11 hmuh belh

Niminpiah khan Mizoram-ah COVID-19 hri kai mi 11 hmuh belh leh an ni a, Mizoram-a hri kai hmuhchhuah chu 1480 an tling tawh.

Sawrkar thuchhuah tarlan danin niminpiah khan ZMC Laboratory-ah sample 1158 enfiah leh niin heng atang hian hri kai 4 hmuhchhuah an ni a, heng mite hi Aizawl District mi vek niin COVID-19 Frontline Workers mi pathum an tel a, Swab Sample latute zing ami vek an ni. Midang pakhat hri kai hmuhchhuah hi hri kai hmuhchhuah tawh nen inkawmhnaih atanga hri kai a ni thung.

Niminpiah vek khan Rapid Antigen Test hmangin hri kai 6 hmuh an ni bawk a, Kolasib District-a Bairabi-ah State pawn atanga rawn lut tur Truck driver mi 2 leh Serchhip District-a BSF Sipai 4 an ni bawk. Heng bakah hian District hrang hranga TrueNat Laboratory-ah hri kai pakhat hmuh ni bawkin hri kai hmuhchhuah chu Mamit District-a hmuh niin Power & Electricity Department a hnathawk, Patharghandhi, Assam atanga lo haw a ni thung. Heti hian nimin thleng khan Mizoram-ah COVID-19 hri kai hmuhchhuah chu mi 1480 tling tawhin mi 929 chu enkawl dam an ni tawh a, hri kai enkawllai 551 an la awm mek bawk a ni.

Tun dinhmunah hri kai enkawllai tamna ber Aizawl District-ah mi 464 enkawl mek an la ni a, Kolasib District-ah mi 32 enkawl niin Lunglei District-ah mi 11 enkawl mek an ni bawk. Khawzawl District chu hri kai enkawllai tlemna ber niin mi pakhat enkawl mek a ni a,Champhai District-ah mi 2 bakah Siaha leh Hnahthial District-ah mi 4 ve ve enkawl mek an ni bawj.

India-ah COVID-19 hri kai nuai 50 an chuang ta :

Darkar 24 kalta chhung khan India ramah COVID-19 hri kai thar 90,123 awm lehin mi 82,961 te chu enkawl dam an ni bawk a. India rama hri kai hmuhchhuah zawng zawng chu nuai 50 an tling tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 11, 16,842 enfiah leh niin heng atang hian hri kai 90,123 hmuh leh an ni a, heng te nen hian India ramah Sample 5,94,29,115 enfiah niin hri kai hmuhchhuah zawng zawng chu 50,20,359 an tling tawh a ni.

India ramah hian darkar 24 kalta chhung khan hri kai 82,961 enkawl dam niin tun thlenga hri kai enkawl dam chu 39,42,360 an tling tawh a, hei hi hri kai hmuhchhuah atangin zaa 78.53 niin tunah hian hri kai enkawllai 9,95,933 an la awm mek a, darkar 24 kalta chhungin hri kai zingah nunna chan 1,290 awm lehin India rama hri kai nunna chan zawng zawng chu 82,066 an tling tawh bawk a, hei hi hri kai hmuhchhuah atangin zaa 1.63 a ni bawk.