Mizoram-ah Buh vawi hnih thar theih beisei a ni

Agriculture Minister, C. Lalrinsanga chuan Mizoram-ah buh vawi hnih thar theih beisei a ni tih a sawi.

Assembly Session neih zawh taka Aizawl North-I bialtu MLA Vanlalhlana zawhna ziaka chhangin Agriculture Minister, C. Lalrinsanga chuan Mizoram sawrkar chuan Mizoram chu ei leh barah kan intodelh thei turah a ngai tih tarlangin, “Kan leilung, WRC leh tlangram enkawl mek te tih changtlun leh develop belhchhah bakah khawl hmanga uar zawka leileh, buhphun, seng leh a herna thlenga hmalakna kalpui tum a niin thalai-a phurna leh chona nasa tak hian khawl hmang phei chuan tum hnih lai buh thar theih beisei a ni,” a ti.

Ei leh bara intodelhna atan hian khawl pawh loneitute hnenah pekchhuah a ni tih sawiin Agriculture Minister chuan, “Tractor leilehna 79, Power Tiller 150 bakah Mini Power Tiller 125 leh buh phunna khawl 12 chu loneitute hnenah subsidy in pekchhuah a ni tawh a. Hei bakah Tractor 47, Power Tiller 150, Mini Power Tiller 100 leh buh phunna khawl pek tum leh mek a ni a. Farmers te mamawh Sprayer, Pump Set leh Brush Cutter te subsidy a pekchhuah a ni,” a ti bawk.