Mizoram-a hri kai enkawl dam zat tlem chhan fimkhur taka enkawl an nih vangah ngai

Health & Family Welfare Minister, Dr. R. Lalthangliana chuan Mizoram-a COVID-19 hri kai enkawl dam zat a tlem chhan chu hri kai mekte uluk tak leh fimkhur taka enkawl an nih avanga ramchhung hmundangte aia an inchhuahtir har thin vang a ni pakhat tih a sawi.

Mipuite hnena COVID-19 chungchanga a sawina ah Health Minister chuan tun dinhmunah Mizoram-a COVID-19 hri kai hmuhchhuah tawh zat 1548 atanga dam taka chhuak chu zaa 62.85 an nih thu a sawi a, Private Hospital leh Private Laboratory-ah te TrueNAT khawl hmanga Sample test leh Rapid Antigen Test kalpui a nih theihnan sawrkar Gazette-ah tihchhuah a nih tawh thu leh he Dan hmang hian Private Hospital leh Private Laboratory-ah te Sample Test leh Rapid Antigen Test kalpui theih a ni dawn ta tih a sawi a ni.

Aizawl khawpui bikah Sample Test ngai a tam em avangin a sang bi ZMC Laboratory-ah a innghakkhawm tawh tih sawiin Minister chuan, COVID-19 do kawnga mi tangkai tak takte Sample emergency-a test sak ngei ngei ngai an awm thin bawk a, anni tih loh chu sample lak ni indawtin test thin a nih thu a sawi a. “ZMC Laboratory a thawkte an rim hle a, tunlai tak phei chuan hahchawl hman lek lovin chhunzan zawmin, tlaivarin Sample Test hna hi an thawk a, mipuiten dawhthei taka an nghah a ngai a ni,” a ti a. A bika enkawl ngailo COVID-19 hri kai, an taksa a symptoms lang chhuak silo, Doctor ten ‘Asymptomatic an ni’ tih an hriatpuite chu an dinhmun a zirin mahni In lama inenkawl phalsak an ni tawh tih a sawi leh bawk a. Hri leng dona kawnga inkaihhruaina eh kalphung pawh herrem zel a nih thu a sawi bawk.

COVID -19 Frontline Workers- VLTF, LLTF, Health Care Workers leh Volunteers zawng zawngte, hahchawl hman lêk lova mipuite he hrileng laka an himna tura theihtawp an chhuahna ah lawmthu sawiin, Kohhran leh Tlawmngai Pawl hrang hrangte thlawpna avangin lawmthu a sawi a. Mipuiten sawrkar ngaichanga thuawih taka an lo dawnsawn thin avangin lawmthu a sawi bawk.

Health Minister tarlan danin, ZMC-ah July atanga sample test na hman tan, RT-PCR khawl 3 hmanga tun thlenga test na atana senso tawh zawng zawng chu Rs. 181,72,108/- a ni a, District tina TrueNAT Laboratory dinna leh a mamawh dang ngaihtuah nan Rs. 382,34,830/- hman a ni a, Rapid Antigen Test tih nan Rs. 183,68,000/- sen a ni tawh bawk.

Comments

Chhiar Hlawhte