Mizoram-ah ni 2 chhungin hri kai 44 hmuh an ni

Inrinni-a Mizoram-a Sample enfiah atangin COVID-19 hri kai mi 30 hmuh belh leh an ni a, Zirtawpni khan hri kai 14 hmuhchhuah an ni bawk.

Inrinni khan ZMC Laboratory-ah Sample 1504 enfiah niin tun tum hi ZMC-a nikhat-a Sample enfiah tam ber tum a ni a, heng atang hian hri kai pakhat hmuhchhuah niin amah hi Aizawl Tuikual North mi a ni a, Symptom neih avanga inrinhlelhna nei leh hri kai tih hmuhchhuah a nih hnua Symptom nei tawhlo a ni thung. Inrinni vek khan TrueNat Laboratory-ah Sample 132 enfiah niin hri kai 26 hmuh a ni bawk a, Lunglei-ah hri kai 20 hmuh niin State pawn atanga rawn lut vek an ni a, an zinga 17 te chu Assam Rifles an ni bawk. Lawngtlai District-ah hri kai 4 leh Kolasib District-ah hri kai 2 hmuh niin State pawn atanga rawn lut vek an ni. Heng bakah hian Rapid Antigen Test hmangin Sample 108 enfiah niin hri kai pathum hmuh an ni bawk a, Kolasib District-ah Truck driver pahnih leh pakhat hi Mamit District-ah Tripura atanga rawn lut a ni thung.

Zirtawpni khan Mizoram-ah COVID-19 hri kai mi 14 hmuh belh niin, an zinga mi 6 te hi tualchhunga hri inkaidarh an ni a. ZMC Laboratory-a Sample 1244 enfiah atangin COVID-19 hri kai mi 6 hmuh an ni a, heng mite hi tualchhung atanga hri kai niin Aizawl Tuithiang Veng-ah hmeichhia 4 leh Kulikawn-ah mi 2 te an ni a, symptoms neilo an ni. Rapid Antigen Test hmangin Mizoram-ah mi 548 enfiah niin heng atang hian hri kai mi pahnih hmuh an ni bawk a, heng mite hi mipa ve ve niin pakhat hi Bihar atanga rawn lut niin midang pakhat hi RAY Falkland Quarantine Centre-a Security Duty, BSF mi leh sa a ni bawk. TrueNat Laboratory-ah sample 212 enfiah niin heng atang hian hri kai mi 6 hmuh an ni bawk a, heng te hi Lunglei-ah Assam Rifles mi leh sa 5 leh Serchhip District-ah Company hnuaia thawk tur mi pakhat te an ni.

India-ah COVID-19 hri kai nuai 54 an tling tawh :

India rama COVID-19 hri kai hmuhchhuah chu nuai 54 an tling ta a, enkawl dam pawh nuai 43 an tling tawh. Ministry of Health & Famliy Welfare chhinchhiahna atanga a lan danin darkar 24 kalta chhung khan India ramah Sample 12,06,806 enfiah leh niin heng atang hian hri kai 92,605 hmuh leh an ni a, heti hian India rama Sample enfiah zat 6,36,61,060 niin hri kai hmuhchhuah chu 54,00,619 an tling tawh a, Sample enfiah atanga hri kai hmuhchhuah hi 8.48% a ni. Darkar 24 kalta chhung khan mi 94,612 enkawl dam niin tun thlenga hri kai enkawl dam chu 43,03,043 an tling tawh a, India hi ram hrang hrang zingah hri kai enkawl dam tam berna ram a ni tawh a, India a hri kai zawng zawng atanga chhutin zaa 79.68 chu enkawl dam an ni tawh a ni. India ramah hian COVID-19 hri kai zingah nunna chan 86,752 an awm tawh a, darkar 24 kalta chhung khan nunna chan 1,133 an awm leh bawk a ni.

Comments

Chhiar Hlawhte