Latest News

Mizoram hi chei danglam ngai lova hmun mawi, Eco-Tourism lama thang mek a ni - Chief Minister

Chief Minister, Zoramthanga chuan Mizoram chu khuanu kutchhuak chei danglam ngai miahlo a hmun mawi, Eco-Tourism lama thang mek a nih thu a sawi.

Hmarchhak State pariat (8)-te Tourism lama tihlarna turin Ministry of DoNER leh North Eastern Council tangkawp chuan internet kaltlangin ni 4 awh tur Virtual Festival buatsaih mekin nimin khan Mizoram chungchang bik pholanna hun darkar khat chhung neih a ni a, he hun hi Chief Minister, Zoramthanga chuan Video Conferencing kaltlangin khuallian niin a hmanpui a. He hunah hian Chief Minister chuan Mizoram chu khuanu kutchhuak chei danglam ngai miahlo-a hmun mawi, Eco-Tourism lama thang mek a nih thu a sawi a. Khualzin tam zawkin Mizoram an tlawh theih nana hmalak dan tur mumal taka rahbi duan niin Mizoram Responsible Tourism Policy 2020 siam a ni, a ti.

Chief Minister chuan Adventure Sports lama tui mite tan Mizoram chu hmun duhawm a ni tih pawh sawiin, India ram hmundanga la tih ngailoh, International Paragliding Accuracy Championship chu Serchhip-ah neih a nih thu a sawi a. Reiek-a Adventure Theme Park te, Thenzawl Golf Resort hawn tharte bakah Mizoram khaw hrang hrangah zin mite tana tlawh chakawm tur hmunhma nuam leh mawi tak tak a awm, a ti a. Zin mite himna turin Tourist Police din a nih thu pawh a sawi bawk.

He hunah hian khual zahawm Tourism Minister, Robert Romawia Royte pawhin Tourism hmasawnnan nasa taka tan lak mek a nih thu leh a bik takin Rural Tourism tihlar tum a nih thu a sawi a. Mizote chu mi hlim thei, mikhualte chunga that chhuah thin Hnam an ni tiin, COVID-19 hripuiin India ram pumpui a tihbuai mek lai pawhin India rama a vawikhatna atana Survey neihah Mizoram chu state hlim ber, ‘Happiest State of India’ a thlan a nih hial thu a sawi bawk.

Destination North East 2020 hi September ni 27 khan Union Home Minister, Amit Shah hovin neih tan a ni a. India ram mai bakah khawvel hmun hrang hrang atangin Internet kaltlangin a duh apiangin he Festival hi an chhim thei a ni. Nitin Focus State siam niin Mizoram chu nimin khan Focus State-ah hmangin Mizoram pual bikin hun hman a ni a. Mizo Hnam lam chi hrang hrangte entir niin Mizote zinga rampum huap pawha langsar Football khelh thiam Jeje Lalpekhlua leh Hockey khel thiam lar Lalremsiami ten thu tawi an sawi a. Sumdawnna leh mimal eizawnna kawnga mi entawntlak thenkhat ten hun an hmang bawk a ni.

Comments

Popular News (Last 30 Days)