Hri kai mi 10 enkawl dam

Serchhip-a COVID-19 hri kai enkawl BSF Sipai mi 10 te chu enkawl dam an nih hnuah nimin khan anmahni enkawlna hmun atanga chhuahtir an ni.

Serchhip CMO Office atanga thu kan dawn danin BSF Sipai hri kai te enkawlna hmun, Nursing School CCC atanga nimin a hri kai enkawl dam mi 10 te hi Serchhip District atanga hri kai hmuhchhuah nilo, District dang-a hri kai hmuh-chhuah leh enkawl tura rawn dah an ni a, niminpiah a hri kai enkawl dam mi 9 te chu Serchhip District-a hri kai hmuhchhuah te an ni thung a ni. 

Heti hian tun thlengin Serchhip District-a hri kai hmuhchhuah mi 48 atangin mi 25 te chu enkawl dam an ni tawh a, hri kai enkawllai 23 an la awm mek a. District pawn lama hri kai hmuh-chhuah enkawl tura rawn dah thar nizan hmasa lamah mi 17 awm lehin heng te nen tunah hian Serchhip District-ah hri kai enkawllai mi 59 an awm mek a, heng zinga 52 te chu Nursing School CCC-a awm niin midang 7 te chu Chhiahtlang Tourist Lodge CCC-a awm an ni thung.

Hetihlai hian hri leng avanga inkhung-hrang pawh Serchhip District-ah mi 197 an la awm mek a, heng zinga mi 25 te chu mahni In lama inkhunghrang niin midang 172 te chu sawrkar hmuhma hmun 9-a inkhunghrang te an ni thung.