Mizoram-a COVID-19 hri kai hmuh 1114 an tling ta

Niminpiah khan Mizoram-ah COVID-19 hri kai mi 21 zet hmuhchhuah leh niin Mizoram-a he hri kai hmuhchhuah chu 1114 an tling ta.

Niminpiah khan ZMC Laboratory-ah Emergency in Sample 12 enfiah niin heng atang hian COVID-19 hri kai thar 8 hmuhchhuah an ni a. Rapid Antigen Test hmangin COVID-19 positive thar 9 hmuhchhuah niin, Lunglei Civil Hospital True-NAT Laboratory-ah COVID-19 positive 4 hmuhchhuah a ni bawk.

ZMC Laboratory-a hri kai hmuhchhuah thar 8 te hi Aizawl District mi vek niin an zinga mi 6 te chu Medical Frontline Worker te an ni a, midang 2 te hi Catering Service a thawk te an ni thung. Heng mite hi kum 26 leh 46 inkar niin positive contact (Local Transmission) atanga kai ni a hriat an ni.

Kolasib District-ah Rapid Antigen Test hmangin COVID-19 hri kai mi 6 hmuh leh an ni bawk a, heng mite Mizoram pawn ami lirthei khalhtute an ni a, Serchhip District-ah Rapid Antigen Test hmangin BSF Sipai 3 te chu hri an kai tih hmuhchhuah niin Lunglei-a TrueNat Laboratory-ah hri kai mi 4 hmuhchhuah thar te hi mipa vek niin BSF sipai, State pawn atanga rawn kir te an ni bawk.

Mizoram-a hri kai hmuhchhuah zingah nimin khan enkawl dam an awm lova, heti hian nimin thleng khan Mizoram-a COVID-19 hri kai hmuhchhuah chu mi 1114 tling tawhin heng zinga 732 te chu enkawl dam an ni tawh a, mi 382 te chu enkawl mek an ni bawk. Tuna Mizo-ram-a hri kai enkawl mek zinga mi 186, zaa 48.69 te chu Civil mite niin midang 110 (28.80%) te chu Paramilitary Force mi leh sa an ni thung a, an zingah BSF an tam ber bawk. Hri kai dang 86, zaa 22.51 te chu State pawn atanga lirthei rawn khalhluttu te an ni bawk.

India ramah COVID-19 hri kai hmuh belh zel a ni :

India ram chu ram hrang hrang zinga COVID-19 hri kai hmuhchhuah tam lamah pahnihna a nih hnuah darkar 24 kalta chhung khan nikhat-a hri kai hmuhchhuah tam ber ni thleng lehin darkar 24 chhungin hri kai 90,802 zet hmuhchhuah an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 7,20,362 enfiah niin heng atang hian COVID-19 hri kai 90,802 zet hmuh leh an ni a, nikhat-a hri kai hmuhchhuah tam ber ni ni lehin nikhat-a hri kai sing kua aia tam an hmuh tum hnihna a ni bawk. Heti hian India ramah Sample 4,95,51,507 enfiah ni tawhin hri kai hmuhchhuah chu 42,04,613 an tling ta a, Sample enfiah atanga zaa 8.48 te chuan hri hi kaiin India chu khawvel-a hri kai hmuhchhuah tam lamah pahnihna a ni tawh a ni.

Hetihlai hian India ramah hian COVID-19 hri kai enkawl dam pawh pung ve zelin darkar 24 kalta chhung khan mi 69,564 te chu dam-ah puan an ni a, heng te nen hian India rama hri kai enkawl dam chu 32,50,429 tling tawhin hri kai atanga zaa 77.30 te chu enkawl dam an ni tawh a, tunah hian hri kai enkawllai 8,82,542 la awmin hri kai zingah nunna chan 71,642 an awm tawh bawk a ni.