India President hova NEP sawihona ah Mizoram-a Zirna thar atana pawimawh sawilang

National Education Policy 2020 chungchang sawihona chu nimin khan India President, Ram Nath Kovind hovin State leh Union Territory-a Governor leh Lt. Governor ten an nei a, Mizoram atang pawhin Governor, P.S.Sreedharan Pillai chu telin H&TE Minister Dr. R. Lalthangliana chuan a tawiawm a ni.

Video Conference kaltlanga National Education Policy 2020 sawihona hunah hian Prime Minister, Narendra Modi chuan NEP - 2020 thiltum pawimawh zual te sawiin, Union Education Minister, Ramesh Pokriyal pawhin thu hmahruai a sawi bawk a. Hemi hnu hian sawihona nei zuiin Mizoram Governor, P.S.Sreedharan Pillai chuan National Education Policy -2020 chu Mizoram sawrkar chuan tha a tih thu sawiin, Mizoram-in a kalpui theih dan turin her rem ngai lai te pawh a awm a; heng te hi ngun takin H&TE Minister Dr. R. Lalthangliana kaihhruaina hnuaiah zir chian mek a ni, a ti.

Governor chuan Hindi tawng thiam pawimawhzia Mizoram-ah pawh inzirtir mek a ni tih he hunah hian sawiin, tun dinhmunah erawh chuan Mizo mipuite tawng hman thiam chu English leh Mizo tawng a nih avangin NEP-2020 hman hunah pawh a remchan dang anga tamin Mizo tawng hman tum a nih thu leh a tul angin English nen hman pawlh a ngai dawn tih a sawi a. Ram inpumkhatna kawng atan NEP-2020 hman tangkai tha a tih thu a sawi tel bawk a. “Hei hi tihhlawhtlin a nih theih nan NEP-2020 ah Student Exchange programme te pawh telh theih ni se a tha ang,” a ti bawk.

Rampum huapa NEP-2020 chungchanga hotulute leh mithiam rualte inrawnkhawmna hi hun thum-ah then a ni a. Hawnna inkhawmah State hrang hrang aiawh ten an State ngaihdan an sawi a. Hemi hnuah hian Special Session neih a ni a; he hunah hian NEP-2020 duangtu zinga a khaipa ber, Dr. K. Kasturirangan, Chairman, Committee for draft NEP chuan thu sawiin, Session hnuhnung ber, Technical Session-ah Prof. Manjul Bhargav, Member, Committee for Draft NEP, Professor of Mathematics, Princeton University leh Prof. N.K. Sridhar, Member, Committee for Draft NEP, Member, UGC ten thu an sawi bawk. India President hova NEP-2020 sawihonaah hian H&TE Minister bakah Mizoram University-a Vice Chancellor, Prof. KRS. Rao leh H&TE Commissioner & Secretary Biaktluanga bakah sawrkar mi pawimawh ten Governor hi an tawiawm bawk a ni.