Wireless Radio System lei chungchang sawifiah

Health & Family Welfare Department chuan thuchhuah siamin tunhnaia Mizoram sawrkar in Wireless Radio System a lei chungchang an sawifiah.

Hemi chungchanga thuchhuah an siamah COVID-19 hripui lengin Mizoram a rawn luhchilh avangin mitin kan ralkhelin kan chi-ai hle a, Health & Family Welfare Department pawhin rang taka hma la in ruahmanna siam a nih thu leh Mizoram chhung hmun hrang hrangah, a bik takin ramri hnaih lamah COVID-19 hri lo luh theihna tur ni a ngaih hmun chi hrang hrang chhuichhuak nghalin Medical Check Post siam nghal a ni tih an tarlang a. Medical Check Post tam zawk hi ramri dep hmun kilkhawr tak taka awm an nih avangin Mobile Phone Network in a cover phak loh bakah Telephone connection a awm lo hrim hrim a, heng Check point atangte hian rang taka report inpekchhawn a tul avangin Wireless Radio System hi a tangkai ber tura ngaih a ni, an ti.

Kan dinhmun thlirin June ni 10, 2020 khan Purchase Committee Meeting on Mizoram State AYUSH Society chuan Wireless Radio System hi lei a rel tih pawh tarlangin, he Wireless Radio System hi Mizoram chhungah B.L Wireless System, Ramhlun Venglai te chu a supply thei awmchhun an nih avangin anni hi thlan nghal an nih thu leh Wireless Radio System hian Walkie-Talkie Handset chauh ni lovin, Antenna, Battery leh Charger te a tel thu an tarlang a. Heng an leina man hrang hrangte pawh hi an tarlang bawk a ni.