Mizoram-ah Sample 52,565 enfiah a ni tawh

Kumin April 7 atanga September 15, 2020 thleng khan Mizo-ram-ah sawrkar hmalakna in sample 52,565 test a ni tawh.

Tunhnaia Mizoram Sawrkarin COVID-19 sample test man to uchuak takin a la nia thuthang chungchanga thuchhuah a siamah he thu hi Health & Family Welfare Department chuan tarlangin, Zoram Medical College (ZMC) Laboratory-ah April ni 7, 2020 atang khan RT-PCR khawl hmangin chhumlo chat lovin nitin sample test hi kalpui a nih thu leh Mizoram sawrkarin RT-PCR khawl pathum (3) a neih hnu phei chuan chak lehzualin test hi kalpui a ni tih an tarlang a. RT-PCR tlukpui tho TrueNAT test pawh Lunglei-ah June 12, 2020 atangin kalpui niin, District tinah TrueNAT khawl bun fel tawh niin tunah hian test kalpui mek a nih bakah Rapid Antigen Test pawh August ni 6, 2020 atangin kalpui a nih thu an tarlang.

Kumin April 7 atanga September 15 thleng khan RT-PCR ah Sample 36,593; TrueNAT Laboratory-ah 2,308 leh Rapid Antigen Test-ah 13,664; a vaiin Sample 52,565 enfiah a nih tawh th tarlangin, Sample Test hi a thlawn vekin rei tak kalpui a nih thu an tarlang a. Sawrkar chuan a thlawn veka test a hautak avangin Indian Council of Medical Research (ICMR) criteria in a huamloh – mahni mimal duhthu leh mamawhna avanga in test duh te leh mahni/mimal sumdawnna leh hna tul avanga Mizoram pawna zin chhuak lo lut leh te, business leh tulna dang avanga Mizoram rawn lut Central PSU, Private Agency, Central Armed Paramilitary Forces (CAPF) hnuaia thawkte thlenga vantlang sum senga a thlawna test vek hi a hautakin Mizoram mipuite lakah pawh a inthlahrunawm a, mahni hna leh sumdawnna thila zin veivak, sum lama harsatna nei lemlo te chuan COVID-19 test nana senso engemaw zat hi chu pe ve tawh se tih rawtna chu State sawrkarin pawmin July ni 30, 2020 khan Notification a tichhuak a, hei hi August ni 24, 2020 khan siam that leh niin COVID-19 sample test hi category hrang hrangah then niin, a tam zawk chu a thlawnin test chhunzawm tur a nih thu leh Category tlem zingah test man lak ve tawh ni se tih a ni tih an tarlang.

Sawrkar thuchhuah chuan RT-PCR test tur hian a bawlhlo chi hrang hrang 36 lai a ngai tih sawiin, heng ah hian sawrkar chuan sum tam tak a senso a ngai thin a. Hetianga sum seng thei nia hriatte’n test man an lo chawi ve hian tlem azawng chu a phuhruk ve lek dawn chauh a ni tih a tarlang a. Tun dinhmunah mi 52,565 test tawh atang hian test man chawi chu mi za zelah 1 (1%) vel awrh chauh an la ni tih pawh tarlangin, Mizoram chhunga Private Hospital/Private Laboratory te pawhin COVID-19 testing (TrueNAT leh Rapid Antigen Test) kalpui ve tawh se tih a nih thu leh hemi atan hian The Mizoram Epidemic Diseases (Covid-19) Regulations, 2020 siam danglam tura thui tak kalpui tawh a nih thu a tarlang bawk.

Comments

Chhiar Hlawhte