Mizoram-ah hri kai 26 hmuh belh leh an ni

Mizoram-ah COVID-19 hri kai mi 26 hmuhchhuah leh an ni a, Mizoram-a hri kai hmuhchhuah chu 1506 an tling tawh.

Sawrkar thuchhuah tarlan danin niminpiah khan ZMC Laboratory-ah Sample 796 enfiah niin heng atang hian hri kai 13 hmuhchhuah an ni a, heng te hi Aizawl Veng hrang hrang 7 atanga hri kai hmuhchhuah te niin an zingah hian hri kaina hriatloh NHM Staff mi 2 an tel a, midang zawng te hi hri kai hmuhchhuah tawh te nen inkawmhnaih atanga hri kai hmuhchhuah te an ni thung.

Niminpiah vek khan Rapid Antigen Test hmangin mi 345 te enfiah niin heng atang hian hri kai 10 hmuh an ni bawk a, Aizawl District-ah mipa leh hmeichhia 4 ve ve hri kai hmuhchhuah niin an zinga mi 7 te chu hri te nen inkawmhnaih atanga kai niin midang pakhat hi Lengpui Airport-a hri kai hmuh a ni thung a, Serchhip District-ah Rapid Antigen Test hmangin BSF Sipai 2 hri kai hmuhchhuah an ni bawk. District hrang hranga TrueNat Laboratory-ah Sample 125 enfiah niin hri kai mi pathum hmuh an ni bawk a, heng te hi Serchhip, Lunglei leh Hnahthial District atangin mi pakhat theuh niin State pawn atanga rawn lut te an ni thung.

Heti hian nimin thleng khan Mizoram-ah COVID-19 hri kai hmuhchhuah chu mi 1506 an tling ta a, heng zinga mi 949 te chu enkawl dam ni tawhin tunah hian hri kai enkawllai 557 an la awm bawk.