Serchhip District-ah COVID-19 hri kai mi 3 hmuhchhuah belh leh an ni

Niminpiah khan Serchhip District-ah COVID-19 hri kai mi 3 hmuh belh leh niin an vai hian State pawn atanga rawn lut leh Quarantine Centre-a awmlai an ni.

Serchhip CMO Office atanga thu kan dawn danin niminpiah khan Serchhip-a TrueNat Laboratory-ah Sample 30 enfiah leh niin heng atang hian COVID-19 hri kai mi pakhat hmuh a ni a, hri kai hmuhchhuah hi NH. 54 siam hna thawktu, Kram Infracon Pvt. Ltd. a thawk niin kum 20-a upa a ni a, West Bengal State atangin Sept. 5, 2020 khan Serchhip District-ah rawn thlengin Chhingchhip a Sainik School Quarantine Centre-ah dah a ni a, niminpiah-a a Sample enfiah a nih hnuah hri a kai tih hmuhchhuah niin nizan khan Chhiahtlang CCC-ah dahluh nghal a ni.

Niminpiah vek khan Serchhip District-ah Rapid Antigen Test hmangin mi 34 enfiah niin COVID-19 hri kai mi pahnih hmuh an ni bawk a, heng mite hi BSF Sipai ve ve niin kum 29 leh 42-a upa an ni a, Bihar leh Rajasthan atanga Serchhip District-a rawn lut niin tun thla ni 14 khan Serchhip an rawn thleng a, TKS Camping Centre-ah dahluh niin niminpiah-a Rapid Antigen Test hmanga enfiah an nih hnuah hri an kai tih hmuhchhuah niin Nursing School CCC-ah dahluh nghal an ni bawk.

Heti hian nimin thleng khan Serchhip District-ah COVID-19 hri kai mi 26 hmuhchhuah an ni tawh a, mi 12 chu enkawl mek niin mi 14 te chu enkawl dam an ni tawh bawk. Serchhip District pawnlam atanga hri kai enkawl tur rawn dah te nen tun dinhmunah Serchhip District-ah hri kai enkawllai mi 71 an awm mek a, BSF Sipai te tana buatsaih, Nursing School CCC-ah mi 67 enkawl mek niin Chhiahtlang CCC-ah mi 3 enkawl mek an nih bakah Thenzawl AYUSH Hospital CCC-ah mi pakhat enkawl mek a ni bawk.

Heng bakah hian Serchhip District-ah hian hri leng avanga inkhunghrang mi 185 an la awm mek bawk a, heng zinga mi 9 te chu mahni In lama inkhunghrang niin midang 41 te chu Vantlang hmuna inkhunghrang an ni a, sawrkar hmunhma 7-ah inkhunghrang mi 135 an la awm mek bawk a ni.

Comments

Chhiar Hlawhte