Chanchin thar thenkhat :

DC in VLTF hruaitute kawm

Lunglei District Bawrhsap, V. Lalsangliana chuan niminpiah khan Lunglei Town Area huamchhunga VLTF Chairman (VCP) leh Vice Chairman (President, Branch YMA) te kawmin COVID-19 hri leng mek dona kawnga hma-lakna a sawipui a. COVID-19 hri leng vanga inkhuahkhirhna chu mimal eizawnna leh mipuite harsatna sutkian a nih theih nana thlahdul deuh a nih rualin, mipuite tan fimkhur zual sauh a tul thu a sawi bawk. Hei bakah hian Bawrhsap chuan VLTF hruaitute chu ngaihtuahna fim tak nena hma la thin tur leh mi harsa zawkte eizawnna tibuai lo zawnga rorel thin turin a chah bawk.

Champhai-ah Vawk 3 man

Champhai District Magistrate in ‘Champhai District chhung khawi khuaah mah Vawk, Vawksa leh Vawksa atanga siam reng rengte lakluh leh phurhchhuah khap tlat a ni,’ tia thupek alo siam tawh bawhchhia North Diltlang khua atanga Champhai-a Vawk lakluh tur pathum (3) te chu Ngur khawdai-ah man a ni a, Vawk neitu leh a phurhna Motor bakah Motor khalhtute pawh man nghal an ni bawk a, heng Vawk te hi talh rual vek niin Rs. 66,000/- hu nia chhut a ni. Cham-phai-ah hian August thla khan ramri kaltlanga lakluh Vawk no 7 chu Tlangsam daiah an lo man tawh bawk a, heng zinga 4 te chuan PRRS an kai tih hmuhchhuah zui a ni bawk.

Sawrkar hmalakna tha ti

MNF Thalai, Mizoram National Youth Front (MNYF) chuan hri leng, COVID-19 chuan Mi-zoram pawh min luhchilh thuk tawlh tawlh tih sawiin, sawrkar pawhin a doletna kawngah theih-tawp a chhuah mek zel tih an sawi a. India ram ah Case nei tlem ber kan nih thu leh Sikkim tih loh ah chuan hri kai enkawllai tlem ber leh thih-pui awmlo chhun State kan nih thu an sawi a. Hei hi kan sawrkar leh khua/veng tina NGO te nen thawhhona tha tak vang a nih thu pawh tar-langin, rampum huap ngaihtuahin kan sawrkar hmalakna hi a tha hle niin an sawi bawk.

BJP in vanduaithlak an ti

BJP Mizoram Pradesh chuan tunhnaia Health Minister, Dr. R. Lalthangliana’n “COVID-19 Positive thar te an chhuichianna a case tam ber chu mipuite kan inthlahdul deuh vang,” tia sawi thu sawrkar thuchhuaha lo lang leh Covid positive tam chhan leh darh chhana mipui a puh chu pawi an tih thu leh vanduaithlak an tih thu thuchhuah siamin an tarlang a. MNF Sawrkar, Pu Zoram-thanga kaihhruaia a beidawn vang leh kalngaihna a hriat tak loh vanga Mizoram mipuite chunga tawngchhuak ta mai ah an ngaih thu pawh tarlangin, mahni mawhphurna zawhloh vanga mawhpuh tur zawng ruai lova, a hna a tlinlo anih chuan midang kian mai turin an ngen bawk.

Sawrkar sum harsa lo ah ngai

Zo People Movement (ZPM) Legislature Party (ZPL) Leader, Lalduhoma chuan hripui lo darh zual zel karah sum harsatna avangin Sawrkar chu a che buai mai ang tih hlauhthawnna a lian hle tih nimin-a mipuite hnena thuchah a sawiah tarlangin, hripui dona lam hawi bika kan sum dinhmun tlangpui thlirin sawrkar chu sum ah a harsa lemlo nia a lan thu a tarlang a. Hripui a len nasat ang zelin Sawrkar pawh a inhawng zau tual tual tura an lo beisei laiin, mipui min hrek nasa tual tual ta hlauh chu hriatthiam harsa an tih thu pawh sawiin, RT-PCR a sample enfiah man chu State dang nen khaikhinin Mizoram-ah a sang fal hle niin a sawi bawk.