Mizoram-ah COVID-19 hri kai 7 hmuh belh leh an ni

Darkar 24 kalta chhung khan Mizoram-ah COVID-19 hri kai hmuhchhuah thar mi 7 awm lehin Mizoram-a hri kai hmuhchhuah zawng zawng chu 1585 an tling tawh.

Sawrkar thuchhuah tarlan danin niminpiah khan ZMC Laboratory-ah sample 1,030 enfiah niin heng atang hian COVID-19 hri kai mi 4 hmuh an ni a, heng hri kai hmuhchhuah te hi mipa leh hmeichhia pahnih ve ve niin Durtlang Leitan-a cheng vek an ni a, hri kai te nen lo inkawmhnaih atanga hri kai nia hriat niin In lama inkhunghrang lai an ni.

Niminpiah vek khan District hrang hrang TrueNAT Laboratory-ah hri kai mi 2 hmuhchhuah ni bawkin Lawngtlai District-a hri kai hmuh ve ve an ni a, Border Roads Organisation (BRO) mi leh sa ve ve niin State pawn atanga rawn lut leh inkhunghranna hmuna awm mek an ni bawk. Rapid Antigen Test hmangin COVID-19 hri kai pakhat hmuh a ni bawk a, he hri kai hi Mamit District-a hmuh niin Power & Electricity Department a thawk lai, Assam atanga rawn lut a ni bawk.

Heti hian nimin thleng khan Mizoram-ah COVID-19 hri kai hmuhchhuah tawh zawng zawng chu 1585 an tling ta a, heng zinga mi 1012 te chu enkawl dam ni tawhin tunah hian hri kai enkawllai 573 an la awm mek a, District hrang hrang zinga hri kai hmuhchhuah tamna ber chu Aizawl District niin hri kai 1037 hmuh an ni tawh a, heng zinga 573 te chu enkawl dam an ni tawh a, Khawzawl District chu hri kai hmuhchhuah tlemna ber niin hri kai 4 hmuhchhuah an ni tawh a, an zinga mi 3 te chu enkawl dam niin hri kai enkawllai pakhat chiah an nei tawh a ni.

India-ah hri kai enkawl dam an pung chho zel :

Darkar 24 kalta chhung khan India ramah COVID-19 hri kai mi 93,356 enkawl dam leh niin India rama hri kai enkawl dam zawng zawng chu hri kai hmuhchhuah atangin zaa 80.11 an tling tawh. Ministry of Health & Family Welfare chhinchhiahna atanga a lan danin darkar 24 kalta chhunga India rama hri kai enkawl dam 93,356 te nen hian India rama hri kai enkawl dam zawng zawng chu 43,96,399 an tling tawh a, hei hi India rama hri kai hmuhchhuah 54,87,580 atangin zaa 80.11 an tling tawh a ni.

Darkar 24 kalta chhung khan India ramah Sample 7,31,534 enfiah leh niin heng atang hian hri kai hmuhchhuah thar 86,961 an awm a, India ramah hian Sample enfiah zawng zawng 6,43,92,594 niin Sample enfiah atanga zaa 8.52 te chuan hri an kai tawh a ni. India ramah hian hri kai enkawllai 10,03,299 an la awm a, darkar 24 kalta chhungin nunna chan mi 1,130 awm lehin India rama hri kai nunna chan zawng zawng chu 87,882 an tling tawh bawk a ni.