NIFFA-in Health Minister hnenah chawimawina hlan

National Integrated Forum of Artists & Activists (NIFAA) Mizoram Chapter chuan nimin khan Health & Family Welfare Minister, Dr. R. Lalthangliana hnenah COVID-19 dona kawnga hna a thawh that avangin chawimawina thuziak an hlan.

Health Minister chawimawina hun nimin a a Pisa-a neih ah hian National Integrated Forum of Artists & Activists (NIFAA), Mizoram Chapter hruaitute chuan India ram State zawng zawngah an inzarpharh thu sawiin, an kum 20-na denchhenin COVID-19 dona kawnga tithate nimin khan State tinah chawimawina hlan an nih thu an sawi a. State tinah mipakhat hnenah theuh chawimawina hi hlan a nih thu sawiin, Health Minister chu hripui leng karah mipuite chi-ai lo leh an sahimna tura a hnathawh that avang leh kawng hrang hranga a hmalakna a chhuanawm an tih vanga he chawimawina hi hlan an nih thu an sawi a ni.

He hunah hian Health Minister, Dr. R. Lalthangliana chuan chawimawina dawn chu a phulo tih sawiin, a mimal hnathawh that vang ni lovin, Zoram mipuite leh khawvel hmun hrang hrang atanga Pathian hnena kan tawngtaina luang khawmin a hrinchhuah, Mipuite, Sawrkar mi leh sa te, Fronline Workers, Volunteers, VLTF/LLTF, Kohhran leh tlawmngai pawl zawng zawngte thawhhona rah in a hrin a nih vang zawkin an aiawhin a lo pawm a ni tih a sawi a. NIFAA te duhsakna hlanin, mipuite fimkhur zui zel turin a chah a, a bik takin kum upate leh natna benvawn neite fimkhur turin a chah nawn bawk.

National Integrated Forum of Artists & Activists (NIFAA) hi kum 2000 khan din niin Karnal, Haryana-ah Headquarters an nei a, Mizo-ram-ah hian Kolasib tih loh District 10-ah an ding tawh a. Vantlang tana tangkai tur kawng hrang hrangin hma an la thin a ni.