Chanchin thar thenkhat :

Larsap in MLA chawimawi

Mizoram Governor, P.S. Sreedharan Pillai chuan nimin khan Mizoram sawrkar-a MLA, Dr. ZR. Thiamsanga chu Emergency Operation hmanga Naute leh a Nu nunna a chhanchhuah avangin chawimawina a hlan. Kumin August thla khan Dr. ZR. Thiamsanga chuan lirnghing in a sawi nasatna hmun, a bial chhunga mipuite thlamuan tur leh thil awmzia hrechiang turin a fehchhuak a. A zinkawngah Nu naupai dinhmun derthawng taka ding mek a awm thu hriain Dr. ZR. Thiamsanga chuan hmanhmawh takin a pan nghal a. Raipuar hi a dinhmun a thatloh avangin hman-hmawh takin a zai nghal a. Nu leh Naute hi an damchhuah phah ta a ni. He a hnathawh chawi-mawi phu tak avang hian nimin khan Mizoram Governor P.S. Sreedharan Pillai chuan Dr. ZR. Thiamsanga, MLA hi Raj Bhavan-ah lenga sawmin Chawimawina Thuziak leh Thilpek a hlan a ni.

Faina-a hmalakna sawiho

Nimin khan Champhai-ah District Bawrhsap, Maria CT. Zuali kaihhruaina hnuaiah Champhai khawpui thianghlim leh fai siam kawnga hma-lakna tur, Champhai Solid Waste Management Bye-Law, 2020 duan chungchang sawihona chu I&PR Conference Hall-ah neih a ni a, he hunah hian faina kawnga mipuite mawhphurhna leh zawm tur hrang hrang duante enho niin, chhungtin te atanga bawlhhlawh bakah eizawnna hmun hrang hrang leh hmunhma dangte atanga bawlhhlawh khawnkhawm, paih leh sawngbawl kawnga man chawi ngai turte sawiho a bithliah nghal a ni a. He dan hnuaia siamthat ngaite siamthain pawm a ni a, hman theih tura hriattirna chhuah anih hnuah a taka hman tan a ni ang.

Dan bawhchhia tam tawh

Kumin May 4-a The Mizoram (Containment and Prevention of Covid-19) Ordinance, 2020 hman anih hnuah nimin thleng khan he Dan bawh-chhia mi 41,224 man ni tawhin an sum chawi tlingkhawm chu Rs. 74,72,300/- a tling tawh bawk.

VC thar te tan Training buatsaih a ni

Nimin khan East Tuipui bial chhunga Village Council thlan tharte tan Champhai DLAO Conference Hall-ah Training neih a ni a, he hunah hian Village Council rorelna chungchang leh Account vawn dan te zirtir niin Mizoram Finance Commission (MFC) 2019-2020 atanga Work Order 1st Installment chu pekchhuah nghal a ni a, East Tuipui A/C huam-chhunga Village Council 25-te hnenah Rs. 23,63,427/- semchhuah a ni a, Bial hrang hrang ten training hi an nei chhunzawm zel dawn a ni.

Party ten dem thu an sawi

Zoram Peoples Movement (ZPM) General Hqrs. chuan Zawlnuam Vengpui-a VLTF venbûk haltute chu a rang thei ang berin sawrkarin manin an phu tawk hremna a pek an phut thu nimin khan thuchhuah siamin an tarlang a. Hemi hmalam hian MPC leh PRISM Thalai chuan thuchhuah siamin he thil thleng hi an dem thu leh he thil ti tu te chungah thil thalo zawk a thlen hmaa hma la vat turin Mizo-ram sawrkar an phut thu an tarlang bawk.

Party 2 inchhunfin dawn

MPC Party leh PRISM Party te chuan nimin khan Aizawl-a MPC Party Office-ah Joint Committee neiin Party pahnihte inchhun-finna tur hun leh hmun tur chungchang an rel a, October 6, 2020-ah inchhunfinna hun hman nise an ti tih thuchhuah siamin an tarlang. Heng Party pahnih te hian an inchhunfin chuan AMC inthlanpui lo awm turah Ward zawng zawngah Candidate neih vek nise tiin an ruahman bawk.