Chanchin thar thenkhat :

Lawngtlai DC in tlangzarh

Lawngtlai District Bawrhsap, Andrew H. Vanlaldika chuan nimin khan Lawngtlai DC Conference Hall-ah Lai Autonomous District Council (LADC)-a Member of District Council (MDC) inthlan lo awm tawha inthlan chuh te leh tlingte dinhmun leh thil pawimawh hrang hrang tar lanna lehkhabu, ‘Members of District Council - Lai Autonomous District Council Election Results & Statistics’ tih chu a tlangzarh a, he lehkhabu tlangzarh takah hian Pawi-Lakher Regional Council inthlan tum 4 (1954, 1959, 1964 & 1970), Pawi Autonomous District Council inthlan tum 3 (1973, 1977 & 1982) leh Lai Autonomous District Council inthlan tum 7 (1988, 1992, 1997, 2002, 2005, 2010 & 2015) result bakah, Lawngtlai District chhunga Members of Legislative Assembly (MLA) inthlan result te a chuang a ni.

Bangladesh ramri-ah Silai man

Mamit District chhung khawthlang lam Bang-ladesh nena inrina-a duty 90th Bn. BSF te chuan nizan hmasa khan dan lova tawlhruk Silai AK-47 (28), AK-56 (1), Carbine (1), a vaiin Silai 30 leh a mu thahnem tak an man a, hemi chungchang ngaihtuah hian nimin khan Mamit SP pawhin Phuldungsei panin thil tihfel ngai te a tifel nghal a ni. BSF IG, Sunil Kumar chuan heng ralthuam kaihhnawih ah hian a neitu nia hriat mi 3 te pawh man nghal an nih thu sawiin, khawi lama thuhruk tur nge an hriat loh thu leh Myanmar atanga rawn kal nia an hriat thu a sawi bawk.

Kawng siam tur inrawnna nei

Champhai District chhung Dungtlang atanga Samthang leh Vaphai tan tlanga Farkawn panna kawngpui, BRTF Road siamthat a nih theih dan tur chungchangah nimin khan Champhai DC, Maria CT. Zuali hovin Dungtlang-ah inrawnkhawmna neih a ni a, he kawng siam tur avang hian ram Hecatare 57 a zau chhe tura chhut niin hemi hu hi Farkawn Site Allotment Board chuan Compensatory Afforestation (CA) atan pek an remti a ni. 

Lok Sabha MP in thlen

    Mizoram Lok Sabha MP, C. Lalrosanga chuan niminpiah khan New Delhi-ah Information and Broadcasting Minister, Prakash Javadekar hmuin Mizoram-a Doordarshan leh All India Radio (AIR) in harsatna an tawhte leh mamawh te a sawipui a. Lok Sabha MP hian DDK Aizawl a Programme leh News lam enkawltu tur hotu bik an awm loh thu sawiin, Senior Officer leh Indian Information Service mi leh sa dah turin a ngen a, Minister chuan I&B Secretary be nghalin DDK Aizawl enkawltu tur Senior Officer dah turin a hrilh nghal a ni. Hei bakah hian Prasar Bharati Chief Executive Officer, Sashi Shekhar Vempat leh member te pawh a kawm bawk.