Mizoram-ah COVID-19 hri kai 43 hmuh belh leh

Pathianni-a Mizoram-a Sample enfiah atangin COVID-19 hri kai mi 43 hmuh belh leh niin heng zinga a tam zawk te chu State pawn atanga rawn lut Sipai te an ni.

Sawrkar thuchhuah tarlan danin Pathianni khan ZMC Laboratory-ah Sample 854 enfiah niin heng atang hian hri kai 36 hmuhchhuah an ni a, heng zinga mi 31 te chu State pawn atanga rawn lut niin BSF Sipai 18, Assam Rifles mi 10, Border Roads Organisation (BRO) mi pakhat leh Civil mi 2, State pawn atanga rawn lut te an ni a, heng bakah hian Aizawl Veng pathum atangin hri kai te nen lo inkawmhnaih atanga hri kai mi 5 an awm bawk a, an zinga pathum chu Bawngkawn mi niin Armed Veng South leh Zonuam mi pakhat ve ve an tel bawk a ni.

Niminpiah vek khan Lunglei TrueNat Laboratory-ah Sample 30 enfiah niin hri kai mi 6 hmuh an ni bawk a, an vai hian Assam Rifles mi leh sa niin State pawn atanga zinchhuak lo vek niin hri kai nen inkawmhnaih atanga hri hi kaichhawng nia rinhlelh avanga Sample enfiah sak te an ni. Rapid Antigen Test (RAgT) hmangin Pathianni khan Sample 342 enfiah ni bawkin heng atang hian hri kai pakhat hmuhchhuah a ni bawk a, hmeichhia kum 19 mi, Durtlang Mel 5-a cheng niin hri kai lanchhuahna neih avanga Sample enfiah a ni.

Nimin khan Mizoram-ah COVID-19 hri kai mi 86 enkawl dam niin Mizoram-a hri kai hmuhchhuah zawng zawng chu 1908 niin, an zinga mi 1459 te chu enkawl dam ni tawhin enkawllai 451 an la awm mek a ni.

India-ah COVID-19 hri kai nuai 60 an tling tawh :

India rama COVID-19 hri kai hmuhchhuah chu nuai 60 an tling ta a, hri kai hmuhchhuah atanga zaa 82.58 te chu enkawl dam an ni tawh thung a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 7,09,394 enfiah niin heng atang hian hri kai 82,170 hmuh leh a ni a, heng te nen hian India rama Sample enfiah chu 7,19,67,230 niin hri kai hmuhchhuah pawh 60,74,702 an ni a, Sample enfiah atanga zaa 8.44 te chuan hri an kai a ni. Darkar 24 kalta chhung khan India ramah hri kai 74,893 te chu enkawl dam niin hri kai enkawl dam chu 50,16,520 an tling tawh a, hri hi hri kai atanga chhutin zaa 82.58 niin hri kai enkawllai 9,62,640 an la awm mek bawk. India ramah hri kai zinga nunna chan pawh 95,542 an tling ta a, darkar 24 kalta chhung khan hri kai nunna chan 1,039 an awm a ni.

Comments

Chhiar Hlawhte