COVID-19 vanga Lockdown puan a nih hnuah Serchhip District-ah sualna tenau a hluar

Integrated Child Protection Scheme (ICPS) hnuaia din, Jail Inspection Team te chuan nimin khan Serchhip District Jail tlawhin naupang, kumtlinglo tang an awm leh awmlo an enfiah bakah an dinhmun te an enfiah a, he hunah hian Principal Magistrate, JH. Lalparmawii chuan Lockdown puan hnuah sualna tenau a hluar thu a sawi.

Nimin-a Serchhip District Jail tlawhtu, Jail Inspection Team te hi Serchhip-a Principal Magistrate, JH. Lalparmawii chuan hovin Serchhip District Jail-ah naupang kum tlinglo, nu leh pa tan avanga tang an awm leh awmloh leh an dinhmun te Quarterly (thla 4 dan)-a enfiah tura tih an nih angin an enfiah a, he Team-ah hian member atan Juvenile Justice Board (JJB) Member mi 2 bakah District Child Protection Unit (DCPU) atangin mi 2 leh NGO leh Social Activist mi pakhat ve ve an tel a, nimin-a Serchhip District Jail an tlawh lai hian kum tlinglo Jail tang erawh an awmlo thung a ni.

He hunah hian Jail Inspection Team Chairman, JH. Lalparmawii chuan kumin March thla a COVID-19 vanga Lockdown puan a nih hnuah Serchhip District-ah sualna tenau a hluar hle tih a sawi a. Naupang chhia mai nia kan la ngaih nula leh tlangval, tleirawl leh rawlthar te te ruihhlo ti an hluar thar nasa ni a sawiin, rukruk leh mahni in tur chhala Zu siam an pung sawt hle tih a sawi. Ruihhlo a hluar hian rukruk leh sualna dang a pung ve zel a, chuvang chuan khawtlang nu leh pa te pawh ruihhlo laka kan tu leh fa te an fihlim theihna rilru leh ngaihtuahna thar nen tan kan lak thar leh a ngai a ni, a ti bawk.

Jail Inspection Team ten Serchhip District Jail an tlawh lai hian Jail tang mi 44 an awm mek a, heng zinga mi 36 te chu mipa niin hmeichhia 8 an awm bawk a, Jail tang zinga mi 6 te chu an thubuai ngaihtuah zawh tawh leh thiamloh chantir te niin an vai hian mipa vek an ni a, midang 38 te chu an thubuai ngaihtuah lai niin an zingah hian hmeichhia 8 hi an tel a. Serchhip District Jail-a tang turte hi an luh tirhin Cell pangngaia dah an nih hmain hri leng avangin Room dangah ni 14 chhung an khunghrang phawt a, chumi hnuah Jail tang dangte nen an dah pawlh chauh thin tih Jail Superintendent, Laldingliana Chinzah chuan a sawi.

Hei bakah hian District Jail Superintendent chuan thawktu an indaihlohna pawh sawiin, Serchhip District Jail a thawk te hi tun COVID-19 Lockdown chhung khan mi 8 lai sawnchhuah an ni tawh tih a sawi bawk.

Comments

Chhiar Hlawhte