Serchhip-ah a thlawnin Ui ^ hri danna pek tan a ni

Nimin September 28, 2020 hi World Rabies Day niin he ni denchhen hian Mizoram pumah tunkar chhung hian Ui-a hri danna pek beihpuithlakna hun buatsaih a ni.

World Rabies Day pual hian AH & Vety Department leh Mizoram State Veterinary Council tangkawp chuan Ui-a hri danna pek beihpui hi thlakin Serchhip-ah pawh nimin atang khan District Vety Hospital-ah hri danna pekna hun hi buatsaih a ni a, he hun hi Serchhip DVO, Dr. C. Zarzokima chuan hmanpuiin he ni an hman leh buatsaih chhan te a sawi a, Ui ^ hri chu natna hlauhawm tak, Schedule-I a awm a ni tih sawiin, Ui ^ hri chu mihring-in a kai chuan thihpui theih natna a nih avangin he hri laka kan him theihna tura kan Ui vulh te tha taka hri danna pek a pawimawh thu leh hemi ang hian World Rabies Day chu hman a nih thu a sawi bawk.

Kumin World Rabies Day-ah hian thupui atan ‘End Rabies : Collaborate, Vaccine’ tih hman niin Free Antirabies Vaccination Week hi 28th Sept. atanga 3rd October 2020 chhung hman tura ruahman a ni a. He Week hman chhung zawng hian Ui-a hri danna hi a thlawna pek theih a ni dawn a, Ui thla thum aia upa, natna nei mek nilo tan Office hun chhungin pek theih a ni anga, nimin khan Dr. H Vanlalrawna, VO leh Dr. Lalruatfela, Animal Husbandry Manager (FOCUS) te kaihhruaina hnuaiah Ui 79 zet te chu hri danna pek hman an ni.