Mizoram-ah COVID-19 hri kai 30 hmuh belh leh

Inrinni-a Mizoram-a Sample enfiah atangin COVID-19 hri kai mi 30 hmuh belh leh an ni.

Inrinni khan ZMC Laboratory-ah Sample 1221 enfiah niin heng atang hian hri kai 23 hmuh an ni a, heng zinga mi 13 te chu hri kai te nen inkawmhnaih atanga Aizawl Veng hrang hranga hri kai niin midang 10 te chu BSF Sipai, State pawn atanga rawn lut an ni. Inrinni vek khan District hrang hranga TrueNat Laboratory-ah Sample 42 enfiah niin Champhai District leh Serchhip dsitrict atangin hri kai 2 ve ve hmuh an ni a, an vaiin State pawn atanga rawn lut vek an ni. Rapid Antigen Test hmangin Inrinni khan Mizoram-ah Sample 539 enfiah niin hri kai 3 hmuh leh an ni bawk a, Serchhip District-ah mi 2 leh Mamit District-ah mi pakhat niin an zinga mi 2 te chu State pawn atanga rawn lut an ni.

Heti hian nimin thleng khan Mizoram-ah hri kai hmuhchhuah chu 1865 an tling ta a, an zinga mi 1371 te chu enkawl dam ni tawhin hri kai enkawllai 494 an la awm mek bawk.

India ramah hri kai enkawl dam an pung zel :

India ramah COVID-19 hri kai enkawl dam an pung zel a, darkar 24 kalta chhung khan India ramah hian hri kai hmuhchhuah aiin enkawl dam an tam zawk a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai hmuhchhuah thar 88,600 an awm laiin hri kai enkawl dam mi 92,043 an awm thung a, hri kai thar aiin enkawl dam hi 3,443 in an tam zawk a, tun thlengin India ramah hri kai hmuhchhuah 59,92,532 tling tawhin hri kai enkawl dam zawng zawng pawh 49,41,627 an tling ta a, hri kai hmuhchhuah atangin enkawl dam hi zaa 82.46 an tling tawh a ni.

India ramah hian Sample 7,12,57,836 enfiah a ni tawh a, Sample enfiah atanga zaa 8.41 te chuan hri hi kaiin tunah hian hri kai enkawllai 9,56,402 an la awm a, hri kai zingah nunna chan 94,503 an awm tawh bawk.