Chanchin thar thenkhat :

Brig. T Sailo Energy Point

Supply Minister, K. Lalrinliana chuan Inrinni khan Bairabi-a Rimawi Veng-ah ‘Brig. T Sailo Energy Point’ chu a hawng. ‘Brig T. Sailo Energy Point’ ah hian Petrol litre 20,000 leh Diesel litre 25,000 dahkhawl theih niin a hawnna ah hian Supply Minister chuan Brig. T. Sailo Energy Point kaltlanga Bairabi khawchhung a hmasawnna rahbi thar kai a ni chu lawmawm a tih thu sawiin, Brig. T Sailo chu Bairabi-a Rel a lo luh theih nana sulsutu pawimawh tak a nih thu a sawi a. Ram tan a mi thawhhlawkte hming chawi-a an faten hetianga hma a la hi fakawm a tih thu a sawi bawk. Minister chuan Mizoram-a Oil leh Gas hnianghnar zawk a awm theih nan Mualkhang Gas Bottling plant chu changtlung zawk a siam a nih theih nan ruahmanna a awm a thu leh Oil Depot bunna tur hmanhma te pawh thlithlai a hmalakna neih a nih thu a sawi bawk.

Health Minister in eitur hlan

Health Minister, Dr. R. Lalthangliana chuan Inrinni khan ZMC COVID-19 Laboratory-a Sample enfiah hna thawktute hnenah Lakhuihthei, Thingfanghma, Apple, Valencia, Dragonfruit, Balhla, Cake leh Frooti engemaw zat a hlan a. Health Minister chuan COVID-19 hripui leng karah ZMC Laboratory-a hnathawk ten hri zawn-chhuah hna a thim a var pawh thlu lova chhun zan zawma rim taka hna an thawk chu an chhuan-awm a tih thu a sawi a. “ZMC Laboratory-a thawkte inpekna hian hripui leng karah 'Zonun zemawi' hmuhtheihin a rawn parchhuah tir hi a ropui hle a ni,” a ti a. Chutiang bawkin Sample lakhawmtute leh Contact Tracing Team te thawh-rimna leh inpekna chu a hlu in Zofate rohlu 'Tlawm-ngaihna' tak tak thinlung pu chung lo chuan mi nazawng tan tlin chi nia a lan loh thu a sawi bawk.

Minister in enfiah

COVID-19 dona atana Bairabi-a lirthei lo lut khalhtute endikna hmun, Screening Point thar sakna tur chu Inrinni khan Supply Minister, K. Lalrinliana chuan a hmunah kalin a enfiah.

Kawngpui dan tum thulh a ni

Tun thla ni 12 zan-a Lailapur-a Mizoram Oil Tanker tihchhiat leh driver kutthlak a nih avanga Mizoram Oil Tanker Driver's Association (MOT-DA) ten naktuk atanga Mizoram chak lakna kawngpui danpin an tum chu MOTDA te thilphut, Oil Tanker chhia siamna chungchangah inremna an neih bakah hliam tuar te enkawlna senso atan Rs. 3000/- chu Silchar Truck Driver's Association (STDA) ten pek an remtih avangin thulh leh a ni. Hetianga inremna neih a nih tak avang hian tun thla ni 18 atanga Truck leh Tanker khalhtu ten Lailapur leh Vairengte inkara Police venhimna an dil leh pek te pawh tihtawp nghal a ni bawk.

Hnathawh hun pek belh

World Bank sum cheng vbc. 83 chuang senna tur, Tlabung atanga Kawrpuichhuah panna kawng sial zawh nan he hna thawk mektu, ABCI Infrastructure Pvt. Ltd. te chu kumin October 31 thleng hun pek belh a ni a. KM 11.85-a thui he kawng siam hna hi kumin April thla ralhmaa thawh zawh tur kha niin hri leng avang leh harsatna dang avangin thawh zawh theih a ni lo a ni. He hna thawktute chuan tunah hian hna thawh tur zaa 6 vel an la hmabak tih an sawi a, he hna an thawh zawh hnuah pawh kum khat dang chu an la enkawl chhunzawm dawn thu an sawi bawk a ni.

FOCUS in Ar note an sem

International Fund for Agriculture Development (IFAD) bultuma khawvela sik leh sa siam-thatna tura hmalakna kal mek- Fostering Climate Resilient Upland Farming System (FOCUS), District Management Unit, Serchhip kaltlangin Thenzawl VC pali huamchhunga chhungkaw   100 hnenah Inrinni khan Ar Note (Rainbow Rooster) 20 theuh pek an ni a. FOCUS hnuaia hmalakna ah hian hmeithai te leh Chhungkaw din-hmun khawsak harsa zawk te chu thlan tura duhsak bik zingah telin FOCUS hmalakna leh an kalphung hrang hrangte zirtir an nih bawk a, tha taka an hmalakna te hlenchhuak tura chah an ni bawk.