YMA Rorel inkhawm neih theih a ni dawn lo

YMA General Conference neihloh kum-a neih thin, YMA Rorel Inkhawm kumin a neih tura ruahman chu hri leng avangin thulh a ni.

Zirtawpni khan Central YMA Executive Committee, CEC chu Aizawl-ah thukhawmin thla thar October 15-a Mizoram University Auditorium-a YMA Rorel Inkhawm neih tura lo ruahman tawh chungchang hi an sawiho a, kumin hian hri leng avangin YMA Rorel inkhawm hi neih loh mai nise an ti a ni. Kum khat dan a neih thin YMA Rorel Inkhawm hi YMA General Conference neihloh kuma neih tura tih niin kum 2016 atang khan neih tan a ni a, kum 2016 khan R. Dengthuama Hall-ah neih niin kum 2018-ah Vanapa Hall-ah neih leh a ni a, kumin-ah chuan neih theih a ni dawn ta lova. Hruaitu hlun chawimawina, Kumpuan, Ramngaw leh Nungcha humhalh leh Tuihna humhalh tha chawimawina te chu nakum (2021) General Conference ah hlan mai ni se an ti a. Kum 2020-2021 CYMA Budget chu CEC in a tul anga ruahmanna an siam tura dah a ni.

Central YMA hian rorel inkhawm bakah hian YMA Rorelna Sang ber Central Coordination Committee (CCC) leh Sub-Hqrs. YMA leh Group YMA te pawh in an Conference neih tur pawh hripui leng avang hian an lo thulh tawh a ni.