Chanchin thar thenkhat :

Khuaibawm semchhuak

Shyama Prasad Mukherji Rurban Mission (SPMRM) kaltlangin Khawzawl Rurban Cluster khaw 9 - Arro, Tualpui, Chawngtlai, Neihdawn, Hmuncheng, Vankal, Ngaizawl, Khualen leh Tualte-a Khuaikhawitu mi 48 te hnenah Khuai-bawm 336 semchhuah a ni a. He hun hi Khaw-zawl BDO, Dr. Saithangpuia chuan hmanpuiin Khuaikhawitute chu thahnemngai taka Sawrkar Scheme kal lai mek hlawhtlinna tura hmala tura chahin, Khuaikhawitute tana ruahmanna duante a sawi a, Khawizu sawngbawlna tura hmalak mek anih dante, Bottling & Packaging leh Labelling awm thlapa Khawzawl Cluster khawizu tharchhuahte khawpui lian zawk thlenga hralhchhuah theih tura ruahmanna kalpui mek a nih thu te a sawi bawk.


International Literacy Day

Nimin Sept. 8, 2020 kha khawvel pum huapa ziak leh chhiar thiam pawimawh zia inhrilh tharna ni, International Literacy Day a ni a, he ni puala thuchah a sawi ah School Education Minister, Lalchhandama Ralte chuan ziak leh chhiar thiam chu hmasawnna zawng zawng bulthut a ni tih sawiin, mimal thanlen nan leh hmasawn nan bakah khawtlang leh ram hmasawn nan thil tul pawi-mawh hmasa ber a ni, a ti. International Literacy Day hi kum 1967 atanga hman tan niin niin ziak leh chhiar thiam pawimawh zia inzirtirna atana hman thin a ni.


Health Secretary in tlawh

Health Secretary, H. Lalengmawia chuan nimin khan Aizawl ITI Veng-a COVID Care Centre chu a hmunah a tlawh a, tunhnaiah helai hmuna awm ten Chaw an nghei tih thu chung-chang chu Local Level Task Force hruaitute nen sawihoin, sawihona atanga a landanin he Centre a awmte chaw supply-tu hi hri leng chungchang ah rinhlelh thil avangin Sample lak tura tih an ni a, hemi chhung hian chaw supply-tu hi an khaihlak deuh avanga chaw nghei anga sawi niin Health Secretary chuan he thil hi pawi a tih thu leh tun hnuah thleng tawh lo se a duh thu a sawi bawk.


Dan bawhchhia man tam tawh

Kumin May 4-a The Mizoram (Containment and Prevention of Covid-19) Ordinance, 2020 hman a nih hnuah nimin thleng khan Mizo-ram-ah he dan bawhchhia mi 39,151 man an ni tawh a, heng mite pawisa chawi tlingkhawm chu Rs. 71,01,900/- a tling tawh bawk. He Dan hnuaiah hian Serchhip District-ah pawh mi 2213 man an ni tawh a, heng mite pawisa chawi tlingkhawm pawh Rs. 27,93,000/- a tling tawh bawk a ni. Mizoram Dsitrict hrang hrang zingah Aizawl District chu dan bawhchhia man tamna ber niin mi 22,054 man an ni tawh a, dan bawhchhia man tlemna ber Saitual District-ah chuan mi 633 chiah man an la awm a ni.


Inkharkhipna thlahdul leh

Niminpiah atanga North Vanlaiphai-a khauh zawka inkharkhipna kalpui chu hri leng avanga chhuizui ngai ang ang te chhui zawh an nih hnuah nimin atang khan khawsak phung a pangngai leh tan a, hri kai te nena lo inkawm-hnai chhungkua te chu Vawiin hian an Sample lak sak an ni anga, heng mi ten an lo kawm hnaih te chu mahni In lama inkhunghrang tura tih an ni bawk. Khawlailung khua ah erawh chuan nimin thleng khan khauh zawka inkharkhip hi kalpui ala ni thung a, dawr leh sawrkar Office te pawh khar la niin heng khua ah te hian loh theihloh a pawn lama chhuak turte chu sawrkar ruahmanna te tha taka zawm tura hriattir an ni bawk.


MNF sawrkar in daih rei ringlo

Mizoram BJP State Executive Virtual Meeting chu niminpiah khan Video Conference hmanga neih niin he hun rawn hmanpuitu BJP National General Secretary, Ram Madhav chuan Prime Minister Modi-a hmalakna in India mipui mitin a huam laiin, Mizoram-a MNF sawrkar chuan Mizoram mipui a huap zo lo hle niin a sawi a, MNF Party mi te pawh a huap kimlo nia sawiin, MNF sawrkar chu a daih rei a rinloh thu a sawi bawk.

Comments

Chhiar Hlawhte