ATM chungchangah hma la

Serchhip District Consumers Association hruaitute chuan tunhnaia Serchhip-a ATM hman hleih theihloh a awm thin chungchangah nimin khan State Bank of India (SBI) Serchhip Branch Manager chu a Office-ah an kawm.

Nimin-a an SBI Serchhip Branch Manager nen an inkawmna ah hian SBI Manager chuan Serchhip AOC Veng-a an ATM chu a Cash Handler a thatloh avangin hman theih a ni rihlo tih sawiin, a siamtu Mechanic hi phai atangin a lo chho tawh a, amah-erawh chu mahse COVID-19 avangin a in khung-hran phawt a ngai a, duh angin siamthat vat a nih theih loh phah thu a lo sawi a, a rang lama an siamthat tur thu a lo hrilh bawk.

Serchhip District Consumer Association te hian New Serchhip-a ATM thalo ngun lutuk chungchangah thuneitute be nghalin thil awmzia an zawtfiah a, New Serchhip-a ATM chu a hlui deuh tawh avangin a chhe ngun hle tih report an dawng a, hemi chungchangah hian State Bank of India (SBI) General Manager-ah a thara thlak turin ngen an tum bawk.

Serchhip-a ATM hrang hrang viltu Bank dangte pawh Consumers Assocaition hruaitute chuan bepawp bawkin, tun dinhmunah Serchhip khawchhungah ATM pathum chu hman theihin a awm mek tih an sawi a. Tuikhuah Veng-a UBI ATM, Serchhip Bazar-a Apex Bank ATM leh New Serchhip-a FIS ATM chu mipui tan pawisa lakchhuah nan hman theih reng a nih thu a en-kawltute chuan an sawi bawk a ni.