Latest News

MZI hruaitu thlanna nei

Mizo Zaimi Inzawmkhawm (MZI) Hqrs. Serchhip chuan nimin khan kum 2021-2022 chhunga an hruaitu tur thlanna MJA Serchhip District kaihhruaiin an nei a, President-ah Otto K. Lalchhuanawma (P&E Veng); Vice President-ah Lalramnghaka Kawlni (Tuikhuah Veng); Secretary-ah C. Zodinthara (Leisang Veng); Asst. Secretary-ah R. Lalrinfela (Bazar Veng); Treasurer-ah Lalnunsiami Khiangte (P&E Veng) leh Fin. Secretary-ah Johny Lalhruaitluanga (Venglai) te thlan an ni.

Lalduhoma’n Dan bawhchhia ah a in ngai lo

MLA atanga ban a nih theihna tura MNF MLA ten niminpiah a Mizoram Assembly Speaker hnena an thlen chungchangah Lalduhoma chuan Anti Defection Law bawhchhia ah a inngaih loh thu a sawi.

Serchhip bial atanga MLA atana thlantlin Lalduhoma chuan Anti Defection Law chu mi-in anmahni thlang tlingtute an phatsana hman tura siam a ni tih sawiin, “Kei chuan min thlang tlingtute ka phatsan lo,” a ti a. MLA inthlan hmain ZPM din a ni tawh tih sawiin Lalduhoma chuan, “ECI atangin Registration kan la neih loh avangin Independent chuan kan ding ngei. Hei hi India rama Political Party ding tharte tih dan a ni a, a hnuah an Vote hmuh dan atangin registration-te neiin recognise-te an ni thin,” a ti a, ZPM Candidate-te chu Common Symbol, Flag leh Manifesto thuhmun vek an nih thu a sawi bawk.

MLA candidate an nih dawnin ZPM-ah rinawm turin thu an tiam vek thu sawiin Lalduhoma chuan, “Anti Defection Law thil tum chu anmahni thlang tlingtu phatsantute hrem a ni. Chutiang chuan kei chuan ka ti ve lo. A tul chuan Court-in thu dik a hailang ang,” a ti bawk.

Hetihlai hian Assembly Speaker, Lalrinliana Sailo chuan he thil thleng hi hrehawm a tih thu sawiin, “Official-te'n dan an thlir anga, dan ang zelin kan kal ang. Complaint thehluttu ten dan tarlan an nei a, chung te chu uluk taka zirchian a nih hnuah thutlukna siam a ni ang,” tiin Dan an ngaih pawimawh ber tur thu a sawi bawk.

Comments

Chhiar Hlawhte