Huaisen lawmman Jeevan Raksha Padak 2019 dawngtu 3 te hnenah lawmman hlan a ni

Mizoram sawrkar-a Home Department buatsaihin nimin khan huaisen lawmman, Jeevan Raksha Padak-2019 dawngtu 3 te hnenah Chawimawina hlanna neih a ni a, Home Secretary Lalbiaksangi chuan he lawmman-in a ken tel Medal, Certificate leh cheque a hlan a ni.

SAD Conference Hall-a Jeevan Raksha Padak-2019 hlanna hunah hian Home Secretary, Lalbiaksangi chuan huaisen lawmman, Jeevan Raksha Padak-2019 dawngtu mi 3 te inpekna leh midangte nun chhanhim nana an nunna thapa, mahni nunna chan hial an awm chu lungchhiattlak ni mahse an thil tih chu mihring in kan mihringpuite tana thil kan tih theih ropui ber a nia a ngaih thu leh an thil tih chu hriatreng tlak a nih thu a sawi bawk. Heng Jeevan Raksha Padak-2019 dawng turte hi Independence Day-ah khan puan ni tawh mah se hripui leng avanga Medal te rawn thawn theih a nih loh avangin Vawiin khan hlan a ni ta chauh a ni.

Jeevan Raksha Padak hrang hrang zinga sang ber, Sarvottam Jeevan Raksha Padak 2019 hi Lalrempuia (L), Armed Veng, Aizawl chuan dawngin, a nupui Lalhmachhuani hnenah hlan a ni a. April ni 5, 2019 khan Lalrempuia (L) chu Balu lain Sairang lui-ah hna thawkin a kal a, lui kam-ah a fapa Samuel Lalrinsanga (10), Chengkawl zawng chu chesualin lui-ah a tla a. Lalrempuia hian tuihleuh thiamlo chungin a fapa tuitla nun chhanhim nan lui-ah zuang lutin a fapa hi a chhanhim a, amah zawk chu tui a tlain a boral ta a ni. Sarvottam Jeevan Raksha Padak hian Medal, Certificate leh pawisafai cheng nuai 2 a keng tel a ni.

Jeevan Raksha Padak dang, Uttam Jeevan Raksha Padak-2019 chu Lianhawla, Tuidam khua Mamit District hnenah hlan a ni a. May ni 15, 2018 khan Lianhawla leh a nupui, Lalnunthari te chu Lo-a feh turin an kal a. Chawhmeh zawnga a nupui a kalsan zawk hlanin Savawm-in a nupui hi lo bei a, a nupui mangang au thawm chu hriain mahni sahimna ngaihtuah lovin a chem ken lai chuan Savawm hi a bei let a a. A nupui hliam na tak tuar chu kawng lamah vak chhoin, tanpui turin a au a, a au ri chu motor a chuang ten lo hriain an tanpui ta a ni. Pu Lianhawla hian hliam na tak tuarin, a nupui pawh hi a lu vun hikin, a taksa peng hrang hrangah hliam na tak tak a tuar bawk a ni. Uttam Jeevan Raksha Padak hian Medal, Certificate leh pawisa fai cheng nuai 1.5 a keng tel a ni.

Jeevan Raksha Padak dang, Jeevan Raksha Padak-2019 chu Lalawmpuia, North Serzawl, Aizawl District hnenah hlan niin June 26, 2019 khan an chenna In a kang a, Choka-a Gas Cylinder chu kang kaiin nasa takin a kang a. Gas cylinder alh lai chu pu chhuakin pawn lamah a thehchhuak a. A nu, a nupui leh a fate 5 nun a chanhim thei ta a ni. Jeevan Raksha Padak hian Medal, Certificate leh pawisa fai cheng nuai 1 a keng tel thung a ni.

Comments

Chhiar Hlawhte